Bashkitë e Shqipërisë nuk do të kenë më të drejtë të japin leje ndërtimi për objektet mbi 6 kate. Përmes një ndryshimi të rregullores për zhvillimin e territorit, Këshilli i Ministrava, ka rrudhur më tej kompetencat e njësive vendore, duke i përqëndruar lejet e ndërtimit tek Këshilli Kombëtar i Territorit dhe Ujit, që drejtohet nga Edi Rama.
Sipas rregullores ekzistuese, njësitë e pushtetit lokal kishin të drejtën ekskluzive të lejeve të ndërtimit për ndërtesat deri në 14 kate lartësi. Por me vendimin e fundit të qeverisë, nga tani ato do të kenë të drejtë të japin leje ndërtimi vetëm për objektet individuale deri në 6 kate.
“Këshilli Kombëtar i Territorit dhe Ujit është autoriteti përgjegjës për miratimin e lejeve të ndërtimit për veprat e infrastrukturës apo/dhe objektet ndërtimore, pavarësisht kushteve dhe kritereve të zhvillimit, kur shtrihen brenda zonës së brezit bregdetar, si dhe çdo objekt mbi 6 kate, kur shtrihen jashtë kësaj zone,” thuhet në vendimin e qeverisë.
Ky ndryshim praktikisht u heq të gjitha lejet e ndërtimit në zonat urbane bashkive të Shqipërisë duke u lënë atyre vetëm lejet e banesave individuale duke e përqëndruar të gjithë vendimarrjen në duart e kryeministrit.
Madje sipas vendimit, rregullorja e re do të prekë edhe lejet që janë në proces aplikimi, të cilat edhe pse do të trajtohen nga bashkitë duhet të marrin miratimin nga KKTU.
“Për të gjitha lejet e ndërtimit, për të cilat është paguar tarifa e aplikimit para hyrjes në fuqi të këtij vendimi, procedura do të vijohet nga autoritetet vendore të zhvillimit të territorit, me kushtin e marrjes së konformitetit nga sekretariati teknik i Këshillit Kombëtar të Territorit dhe Ujit,” thuhet në vendim./ Kapitali.al
