Nga Elton Laska
Në çdo cep të Tiranës po ngrihen kulla e pallate shumëkatëshe, si kërpudhat pas shiut. Asnjë logjikë urbane, asnjë llogjikë ekonomike, asnjë plan afatgjatë, vetëm beton që mbyt çdo hapësirë publike, çdo frymëmarrje.
Ndërkohë që të rinjtë ikin, çmimet e banesave rriten dhe qyteti zihet nga ndërtime gjigante që nuk dihet se për kë ndërtohen. Pyetja që po bëhet gjithnjë e më shqetësuese është: nga vijnë paratë për gjithë këto kulla?
Një përgjigje e ka edhe emisioni Report në Rai3-shin italjan.
Ka dyshime të forta dhe të përsëritura se një pjesë e mirë e këtyre projekteve po financohen nga kapitali informal, para të pista që pastrohen përmes betonit.
Asnjë autoritet nuk jep shpjegime bindëse, ndërkohë që qyteti po humbet fytyrën dhe identitetin e vet.
Sikur të mos mjaftonte kjo etje për ndërtim, qeveria po hedh hapat e parë drejt shembjes së Pallatit të Kongreseve dhe godinës së RTSH-së, dy simbole historike dhe funksionale të kryeqytetit.
A është kjo pjesë e të njëjtës etje për truall të shtrenjtë, që më pas do t’u dorëzohet klientëve të zakonshëm të partisë për ta kthyer në kulla?
Tirana nuk është një tokë pa zot. Është kryeqyteti ynë, dhe nuk mund të lejojmë që të kthehet në lavatriçen më të madhe të pastrimit të parasë në Ballkan. Duhet të ngremë zërin, pa vonesë.
