Kryeministri Edi Rama ka rikthyer sot rubrikën e tij “të preferuar” në rrjete sociale, “Sy m’Sy”. Një qytetar i kujtoi sot se pas 13 vitesh në pushtet, në vend që të përmirësojë shërbimet bazë si uji i pijshëm, ende merret me “ushtri socialiste”.
“Ke 13 vite në qeveri dhe mendon si të bësh ushtri socialiste. Fillo me ujin e pijshëm në gjithë vendin se jemi në kohën e Zogut”, i shkruan qytetari.
Rama nuk u mor me ujin, por iu kthye me një frazë tipike: “Këto janë komentet tipike të hedhjes së pallavrave.” Sipas tij, qeveria nuk ka ndërtuar “ushtri socialiste”, përkundrazi –ai beson se transformimi i administratës është një ndër arritjet më të mëdha të tij, që na ka çuar drejt negociatave me BE-në.
Në vend që të japë përgjigje për mungesën e ujit, varfërinë, korrupsionin apo shërbimet publike, Rama preferon të flasë për “ushtri” dhe “administratë moderne”, si një pasqyrë që ndoshta ekziston vetëm në realitetin e tij virtual.
Ironikisht, qytetarët sot s’kanë ujë, por kanë “rubrikë live”. Mungojnë kushtet bazë, por kanë “ushtri jo-socialiste”. E vetmja gjë që s’mungon, janë fjalët.
