Tre persona janë arrestuar nga policia e Sarandës, pas sherrit në Ksamil mes dy sipërmarrësve, të cilët u konfliktuan me sende të forta për një hapësirë publike në plazh.
Nga sherri mbeti i plagosur Albert Pashaj 46 vjeç, ndërsa në prangat e policisë ra pronari i “Sunset Beach Bar”, Agim Taraj 43 vjeç banues në Berat, Silvjan Sulku 18 vjeç banues në Dibër dhe Aldo Zeqiraj 35 vjeç banues në Dibër.
Nën hetim për këtë ngjarje është edhe një i mitur 17-vjeçar nga Kamza. Sipas policisë, personat e shpallur në kërkim dhe 17-vjeçari dhunuan me sende të forta Albert Pashajn, duke e lënë të gjakosur.
Gjithashtu, lidhur me këtë ngjarje, u referuan materialet në Prokurori për veprën penale “Shkatërrimi i pronës” dhe nisi procedimi penal për shtetasen me iniciale O. P., 40 vjeçe, pasi pas konfliktit ajo ka dëmtuar ambientin duke shkatërruar pajisje dhe sende të tjera në “beach bar”-in e Agim Tarajt.
“Në vijim të zbardhjes së plotë të rrethanave të konfliktit të ndodhur ditën e djeshme, në Ksamil, dhe dokumentimit të plotë të ngjarjes, me qëllim vënien përpara përgjegjësisë penale të autorëve, specialistët për Hetimin e Krimeve në Komisariatin e Policisë Sarandë arrestuan në flagrancë, për veprën penale “Plagosje e lehtë me dashje”, kryer në bashkëpunim, shtetasit:
A. T., 43 vjeç, banues në Berat, S. S., 18 vjeç, banues në Dibër dhe A. Z., 35 vjeç, banues në Durrës.
Gjithashtu, u procedua penalisht në gjendje të lirë, për shkak të moshës, një shtetas i mitur, 17 vjeç, banues në Kamëz, Tiranë.
Nga hetimet rezultoi se këta shtetas, në bashkëpunim me njëri-tjetrin, për motive të dobëta, kanë goditur me sende të forta, pranë një plazhi publik në Ksamil, shtetasin A. P., 46 vjeç, banues në Tiranë, duke i shkaktuar dëmtime trupore.
Gjithashtu, lidhur me këtë ngjarje, u referuan materialet në Prokurori për veprën penale “Shkatërrimi i pronës” dhe nisi procedimi penal për shtetasen O. P., 40 vjeçe, pasi pas konfliktit kjo shtetase ka dëmtuar ambientin duke shkatërruar pajisje dhe sende të tjera në “beach bar”-in e shtetasit të arrestuar A. T.“, njoftoi policia.
Materialet procedurale i kaluan Prokurorisë Sarandë, për veprime të mëtejshme.
Si ndodhi konflikti?
Konflikti për një hapësirë plazhi ka degraduar në përplasje fizike ditën e djeshme në Ksamil. Në sherr prej disa kohësh janë përshirë dy pronarë, Albert Pashaj i “Euro Hotel” në Ksamil dhe Agim Taraj pronar i “Sunset Beach bar”. Mesditën e së shtunës, Albert Pashaj shfaqet në një video i gjakosur, i dhunuar me sende të forta teksa në plazh ishte me familjen e tij.
Në këto pamje, shfaqet një person që largohet me vrap, të cilin familjarët e Pashajt e akuzojnë se qëlloi pronarin e hotelit.
Zona e lakmuar nga dy pronarët për të vendosur çadra ndodhet në hyrje të vijës bregdetare të Ksamilit, dhe është caktuar nga bashkia si hapësirë për plazh publik. Ura[ortua se Pashaj pretendon se ishte Taraj që e ka goditur dhe konflikti me sulme fizike sipas tij, kanë ndodhur edhe më parë. Ai veçon se sherrin mes dy pronarëve e la të hapur Bashkia e Sarandës.
Të dyja palët kanë aplikuar për të marrë leje për të njëjtën hapësirë pranë Agjencisë Kombëtare të Bregdetit. Albert Pashaj thotë ai bëri e fitoi të drejtën për të vendosur 52 çadra për hotelin me 26 dhoma, por bashkia nuk erdhi për të bërë matje dhe Agjencia Kombëtare e Bregdetit e skualifikoi për mungesë të paraqitjes së dokumentacionit.
Të afërmit e Agim Taraj po ashtu deklarojnë se, kur nuk e morën lejen për hapësirën e plazhit, Taraj ndërpreu kontratat për të marrë hotel me qira dhe vijoi vetëm me biznesin e lokalit, i cili ndodhet në zonë prej 16 vjetësh.
Sipas familjarëve, Taraj nuk e ka goditur këtë të shtunë pronarin e hotelit, por Pashaj ka provokuar një konflikt me punëtorët në lokal.
Detaje të reja nga sherri në Ksamil, ja si nisi konflikti/ VIDEO
