Pasi përfundoi me “shown” në Theth ku shembi ndërtimet pa leje, duket se tashmë Edi Rama i është kthyer ndërtimeve të legalizuara në shkelje të ligjit, në dukje me korrupsion ndaj zyrtarëve të Aluiznit.
Ai ka publikuar në rrjetet sociale pamjet e një shtese lokali në Tiranë dhe një vendim që mban datën e sotme, ku i anulohet legalizimi që kishte marrë më 12 Mars.
Rama nuk e përmend faktin që ai legalizim është dhënë para zgjedhjeve të 11 Majit, por paralajmëron ndëshkim për punonjësit e Aluiznit dje apo të Kadastrës më pas, që kanë firmosur për këto legalizime kriminale, sipas tij.
Po ashtu shtohet dhe pyetja nëse përgjegjësia është vetëm tek punonjësit e thjeshtë apo edhe tek drejtuesja e Agjencisë Shtetërore të Kadastrës, Lorena Goxhobelli.
“Për të gjitha këto lloj çmendurish me qëllim fitimi në kurriz të komunitetit, të cilat kanë marrë dokument legalizimi në hapësirën publike duke ngritur tenda hekuri, jo vetëm që do të reagohet me zero tolerancë duke i anulluar ligjërisht, por do të miratohet së shpejti, si pjesë e reformës së re të kontrollit të territorit edhe një masë për ndëshkimin penal të të gjithë atyre nëpunësve të Aluiznit dje apo të Kadastrës më pas, që kanë firmosur për këto legalizime kriminale në mes të lagjeve të qyteteve tona.” – shkruan Rama.
