Erinda Ballanca po e ushtron detyrën e Avokatit të Popullit përtej afateve kushtetuese, pasi i ka mbaruar mandati që prej Marsit të vitit 2022.
Ajo duhet ta kishte liruar “karrigen” para tre vitesh, por zgjedhja e Avokatit të ri të Popullit kërkon 84 vota në Kuvend dhe është mbajtur “peng” e dakordësisë politike PS-PD.
E teksa po e ushtron detyrën pa mandat, Erinda Ballanca ka vendosur që të rreshtohet në krah të Qeverisë, dhe jo të jetë në mbrojtje të popullit ashtu siç ja cakton detyra.
Sot Ballanca ka dalë në një deklaratë për mediat për atë se çfarë po ndodh në fshatin turistik të Thethit, ku me dhjetra forca policie po ushtrojnë “terror” ndaj banorëve, duke u shembur bujtinat me dhunë.
Por, sipas Erinda Ballancës, banorët e Thethit duhet t’i ankohen zyrtarisht Avokatit të Popullit për të filluar një verifikim për atë se çfarë po ndodh, pasi nuk i mjaftojnë denoncimet publike në media.
Gjatë deklaratës pëlr mediat, Erinda Ballanca u kujdes që ta thonte me dhjetra herë që ajo është kundër ndërtimeve pa leje, duke tentuar që të japë në publik mesazhin se ajo çfarë po ndodh në Theth është një aksion kundër paligjshmërisë.
“Nuk dalim me deklarata të menjëhershme individuale. Nëse verifikojmë se ka një çështje e cila mund të përbëjë shkelje të të drejtave të njeriut ne mund të nisim një rast me iniciativë. U duhet dhënë kohë banorëve të ankohen dhe të shkojnë në gjykatë. Ne nuk mbështesim ndërtimin e paligjshëm dhe kaotik.
Në Theth nuk kemi një ankesë, do të duhet që qytetarët të bëjnë një ankesë. Nuk ka ende ankesë nga qytetarët, por ata mund të na çojnë sms e të na tregojnë. Ne duhet ta shohim situatën, por presim ankesa. Ndërkohë që dua të bëj të qartë se avokati i popullit është kundër ndërtimeve pa leje.” – tha Erinda Ballanca.
Ballanca u zgjodh në postin e Avokatit të Popullit më 22 Maj të vitit 2017 pas marrëveshjes Rama-Basha, e duket se me 8 vite në detyrë, ajo ka zgjedhur që të rreshtohet në krah të Ramës për të qëndruar sa më gjatë, pasi ky i fundit e ka në dorë për të mbajtur “peng” zgjedhjen e Avokatit të ri të Popullit.
