Këshilltarja demokrate e Bashkisë së Elbasanit, Bjanka Çopja, foli në lidhje për situatën mjedisore në qytetin e Elbasanit pas djegies së mbetjeve në landfill.
Çopja deklaroi se Elbasani po përjeton një katastrofë të vërtetë ekologjike dhe akuzoi bashkinë për mungesë reagimi, pavarësisht paralajmërimeve të hershme nga këshilltarët e opozitës.
“Do thoja me vetëdije të plotë që Elbasani është përballë një katastrofe mjedisore, sepse momentalisht që po flasim pas 4 ditëve të djegieve dhe mbetjeve në fushën e grumbullimit të mbetjeve, me ajrin në Elbasan nuk mund të marrësh dot frymë. Tymi vazhdon akoma dhe ajri është tmerrësisht i ndotur. Qytetarët me të drejtë janë tmerrësisht të revoltuar dhe të pashpresë se çfarë duhet bërë dhe si duhet dhënë zgjidhje.
Masa nuk janë marrë aspak nga Bashkia në Elbasan, sepse kjo është një situatë e paralajmëruar sidomos nga ne këshilltarët bashkiakë të opozitës. Ne kemi që në vitin 2023 që e paralajmërojmë këtë problem. Ky nuk është më as landfill, thjesht një vend për grumbullimin e mbetjeve. Fusha e mbetjeve ka kaluar edhe lejen e mbajtjes, sepse leja mjedisore është marrë për një kapacitet prej 25 deri në 30 mijë ton mbetje, e tashmë flasim për një kapacitet deri në 200 mijë ton mbetje.”, tha Çopja në Syri TV.
