Sali Berisha mungoi sot në seancën gjyqësore ndaj tij dhe dhëndrit Jamarbër Malltezi që po gjykohen për dosjen e privatizimit të ish-kompleksit “Partizani” në Tiranë, me motivin se nuk ishte njoftuar sipas ligjit.
Eugen Beçi, ish-prokuror i Krimeve të Rënda dhe avokat, i ftuar në emisionin “Të Paekspozuarit” sqaroi se sipas procedurës, ftuesi gjyqësor duhet të merrte fletëthirrjen për gjyq nga kryesuesi i seancës dhe duhet të kishte shkuar në adresën e shtëpisë së Berishës dhe të merrte firmën dhe shkresën pastaj ia paraqet gjykatës, e cila pastaj do të vendoste nëse ai kishte apo jo dijeni për ditën e seancës.
Pjesë nga biseda
Eugen Beçi: Referuar njoftimeve proceduariale dhe faktit që pas seancës paraprake dhe filloi gjyqi i themelit, fakti që procedimi ka filluar me gjykim të zakonshëm, procedurën e ndjek gjykata tani. Duke iu referuar mënyrës së si procedura njeh proces të rregullt, njoftimi është akt që paraqitet nga ftuesi i gjykatës dhe personi duhet të marrë njoftim personalisht. Shumë gjyqe kthehen dhe prishen për faktin që një njoftim për një seancë nuk ka dijeni personalisht dhe për këtë arsye, mund të përbëjë shkak për proces të parregullt ligjor. Nëse nuk bëhet shkresa përkatëse dhe nuk është firmosur njoftimi i gjykatës, duket absurd, por është procedurë që duhet ndjekur. Aq më tepër që duhet të kemi në konsideratë faktin që mbrojtja do t’i referohet çdo procedure. Ti referohemi pastaj edhe zakonit në Shqipëri, që në 90% asnjëherë seanca e parë nuk është e suksesshme, pikërisht për shkak të njoftimit.
Kryesuesi i seancës nxjerr fletëthirrje që ia jep ftuesit gjyqësor. Ai duhet të shkojë në adresë dhe të marrë firmën dhe shkresën ia paraqet gjykatës. Gjykata merr shkresat dhe thotë filani ka apo jo dijeni. Ftesa duhet bërë dhjetë ditë përpara, por nuk ka firmosur personi. Në procedurë, edhe nga gjykata dhe prokurori, këto njoftime janë shumë të rëndësishme për procesin e rregullt ligjor. Këto pastaj bëhen shkak për pavlefshmëri.
Baton Haxhiu: Përtej procedurës ne duhet të dimë dicka. Edhe në vendet më të prapambetura, te procedura e ftesës nuk calohet.
Eugen Beçi: Në momentin që nuk merr dijeni, gjykata që të mos vonojë procesin, njofton policinë gjyqësore dhe jo ftuesin. Në rast se nuk shkon, njofton policinë e shtetit. Këto janë procedura, që në fund në Strasburg, dikush nga mbrojtja mund ta përdorë. Kjo është procesi i rregullt ligjor. Arsyeja pse duhet të mos ndodhë, është shtyrja e seancës, do të shtyhet edhe dy javë.
Ergys Mërtiri: Kush ka interes ta vonojë këtë?
Eugen Beçi: Nuk ka interes as gjykata dhe as prokurori.
