Një përplasje e dhunshme për hapësirën e plazhit në Radhimë ngre shqetësime për sigurinë dhe zbatimin e ligjit në zonat turistike
Një incident i rëndë ka ndodhur së fundmi në Radhimë, ku pronarja e një subjekti turistik është dhunuar fizikisht për shkak të një konflikti pronësie. Ngjarja ka rikthyer në vëmendje tensionet mes bizneseve që operojnë në zonat bregdetare gjatë sezonit turistik.
Sipas dëshmisë së vetë subjektit “Baro Beach”, i lidhur me “Hotel Dion”, konflikti nisi kur fqinjët e tyre, të cilët pretendojnë të njëjtën hapësirë plazhi, tentuan të pushtonin zonën që “Baro Beach” e ka të kontraktuar për përdorim pesëvjeçar që nga viti 2021.
Përfaqësuesit e Baro Beach thonë se konflikti ka eskaluar pasi fqinji, identifikuar si Adjon Hanxhari, i lidhur me subjektin “Oricon Coast”, ka dërguar persona për t’i dhunuar fizikisht. “Na tregoi forcën e tij me bodigardë”, pohuan pronarët e dhunuar për JOQ Albania.
“Ne jemi një biznes që operon në Radhimë, me leje të rregullt për përdorimin e hapësirës së plazhit për një periudhë prej pesë vitesh, që nga viti 2021.
Fqinji ynë pretendon se kjo hapësirë i përket atij, vetëm sepse është ‘i fortë’. Sot, ai na tregoi ‘forcën’ duke dërguar truprojat e tij për të na dhunuar fizikisht.
“Personi në fjalë është Adjon Hanxhari, i cili pretendon përmes biznesit të tij ‘Oricon Coast’ se hapësira i takon atij. Në fakt, është ai që ka ushtruar dhunë ndaj nesh.”
“Ne jemi ‘Baro Beach’ dhe jemi të lidhur familjarisht me ‘Hotel Dion’. Për më tepër, struktura jonë figuron qartë në Google Maps që prej vitit 2010, kohë kur zoti Adjon Hanxhari nuk kishte asnjë prani në atë zonë.”
“Se dy nga ne perfunduan ne urgjence, edhe djali (me nenshtetesi italiane) mori shume goditje”
Për të vërtetuar të drejtën e tyre mbi hapësirën e plazhit, ata i referohen kontratës zyrtare të nënshkruar më 3 gusht 2021 me Agjencinë Kombëtare të Bregdetit dhe Bashkinë Vlorë. Dokumenti u firmos nga zonja Floresha Mukaj në emër të subjektit qiramarrës.
Në kontratë përcaktohet qartë se hapësira prej 200 m2 në parcelën VL-291 i është dhënë me qira subjektit në fjalë për një afat pesëvjeçar, bazuar në vendimin e Këshillit të Ministrave nr. 171 të datës 27 mars 2019.
Për më tepër, përfaqësuesit e “Baro Beach” pohojnë se ndërtesa dhe struktura e tyre figurojnë në Google Maps që nga viti 2010, kohë kur “Oricon Coast” nuk ekzistonte në atë zonë.
Ngjarja ka ngjallur reagime të forta në opinionin publik dhe pritet që autoritetet vendore dhe organet ligjzbatuese të hetojnë rastin dhe të garantojnë mbrojtjen e të drejtave kontraktuale të subjekteve që veprojnë në përputhje me ligjin. Palët janë shoqëruar në polici për të zgjidhur konfliktin.
Zhvillime të tilla tregojnë nevojën për një monitorim më të rreptë të hapësirave publike dhe për një mbështetje më të madhe për sipërmarrësit që investojnë në turizëm në përputhje me normat ligjore./ JOQ
