Në fshatin Donofrosë të bashkisë Dimal, qarku Berat, nxënësit ndjekin mësimin në kushte të papërshtatshme dhe të rrezikshme për jetën.
Mjediset ku zhvillohet mësimi janë përshtatur në një lokal të vjetër pa oborr, ndërsa klasat janë të ndara me fibra dhe dyert janë zëvendësuar me perde. Zhurmat e vazhdueshme mes një klase dhe tjetrës e bëjnë thuajse të pamundur përqendrimin dhe ndjekjen e mësimit.
Prindërit dhe banorët e zonës shprehen të shqetësuar për sigurinë dhe të ardhmen e fëmijëve ndërsa bashkia Dimal me kryetare Juliana Memaj, drejtoria arsimore rajonale, Ministria e Arsimit dhe Sportit, heshtin. Kjo situatë alarmante ndodh në një vend që aspiron të bëhet pjesë e Bashkimit Europian, ndërsa fëmijët mësojnë në kushte që nuk përmbushin as standardet më minimale në një shkollë. Kjo është një situatë që duhet të marrë zgjidhje.
“Përshëndetje! Kjo është shkolla ku bëjnë mësim nxënësit e shkollës së fshatit Donofrosë në bashkinë e Dimalit. Klasat janë të ndara me fibra dhe dyert me perde dhe për të dëgjuar mësimin është e vështirë për shkak të zhurmave. Si shkollë është përshtatur një lokal i cili nuk ka mjedis rrethues dhe është burim aksidentesh. Ju lutem bëjeni publik si rast sepse askush nuk po kujtohet për ne. Kjo është Shqipëria që aspiron të futet për në BE”, shkruan qytetari./ JOQ
