Gjykata e Lartë ka rrëzuar rekurset e nënë e bijë, Valbona dhe Ajola Xoxës.
Bashkëshortja e Erion Veliaj dhe vjerra e tij kundërshtonin kontrollet e ushtruar nga BKH me urdhër të SPAK në banesa dhe zyra në lidhje me hetimet për çështjen e kryebashkiakut të Tiranës.
Po ashtu kërkonin dhe heqjen e sekuestros për një vilë në Qerret, e cila rezulton në emër të Valbona Xoxës, por nga hetimet e SPAK rezulton si një pronë e fshehur e Erion Veliajt dhe Ajola Xoxës.
SPAK dyshon se Erion Veliaj ka fshehur pronësinë e vilës në kompleksin turistik “Marea” në bregdetin e Qerretit, në Kavajë, duke e vendosur në emrin e prindërve të bashkëshortes, Valbona Xoxa dhe Arben Xoxa (tashmë i ndjerë).
Emri i Veliajt figuron në listën e pagesave për mirëmbajtjen e vilës (6 A), ndërsa emri i bashkëshortes së tij, Ajola Xoxa, figuron në fatura pagesash për arredimin e vilës, ndërtimin e një pishine para ndërtesës e të tjera të ngjashme. Po ashtu, në dosjen e SPAK janë edhe sinjalet e telefonit që figuronin në zonën e Qerretit, kryesisht në fundjave.
Tashmë, vila do të vijojë të jetë e bllokuar.
Rekurs ishte depozituar edhe nga dy shoqëritë “AVA STUDIO” SH.P.K dhe “PARTNERS LAW” SH.P.K, të cilat kërkonin heqjen e sekuestros, por edhe ato janë rrëzuar.
Erion Veliaj u arrestua mesditën e 10 Shkurtit në Bashkinë e Tiranës, teksa pas një hetimi 1 vjeçar, SPAK i ka ngritur akuzat për kryerjen e veprave penale “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”.
Pas vendimit të Apelit, Erion Veliajt iu shtua edhe akuza e futjes së sendeve të ndaluara në qelitë e paraburgimit, pasi ishte në përgjim dhe zhvilloi telefonata me celularin e një prej efektivëve të Burgjeve, teksa ishte në fugon për t’u transferuar në burg.
Ajola Xoxa ndodhet në masën “detyrim paraqitje”, teksa akuzohet nga SPAK për “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”.
Nga hetimi i SPAK ka rezultuar se Erion Veliaj dhe Ajola Xoxa kanë krijuar një skemë përfitimi ryshfetesh për pasurim personal përmes një numri organizatash dhe kompanish të kontrolluara prej tyre apo të afërmve të tyre dhe kanë përfituar së paku 1.1 milionë euro në nëntë raste. Veliaj akuzohet se ka përfituar tre vila në një fshat turistik në Qerret ndërsa Xoxa akuzohet se ka shpenzuar rreth 800 mijë euro në blerje online, të cilat nuk i ka deklaruar në deklaratat vjetore.
Biznesmenët Elman Abule, Gentian Sula, Shkëlqim Fusha, Fatmir Bektashi, Meriman Palushi dhe Sokol Kryeziu në këmbim të tenderave nga Bashkia e Tiranës dhe lejeve të ndërtimit, i ofronin Erion Veliajt, shuma monetare nëpërmjet blerjeve fiktive, biletave avioni, sponsorizimeve, OJF-ve të Ajola Xoxës, si dhe pasurive të paluajtshme, si disa vila në Qerret.
Ndërkoh, më 22 Maj, SPAK rëndoi pozitat penale të çiftit Erion Veliaj-Ajola Xoxa, pasi i shtoi një akuzë të re, si dhe i sekuestroi edhe një tjetër apartament, e cila dyshohet si pasuri e fshehur e tyre.
Bëhet fjalë për apartamentin në katin e dytë të godinës ku ndodhet dhe apartamenti i Erion Veliajt dhe Ajola Xoxës në zonën e “Kodrës së Diellit” në kryeqytet, ku më parë ishte ushtruar kontrolle edhe nga oficerët e BKH-së.
Ndaj çiftit Erion Veliaj-Ajola Xoxa është shtuar akuza e veprës penale “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Aktualisht Erion Veliaj ndodhet në paraburgimin e burgut të Durrësit, teksa është në pritje të seancës në Gjykatën e Lartë, ku ka bërë rekurs dhe kërkon zbutjen e masës së sigurisë.
