158 ushtarakë të dyshuar për lidhje me lëvizjen e Fetullah Gylenit, predikuesit të ndjerë që Ankaraja e akuzon si organizator të grushtit të dështuar të shtetit në vitin 2016, janë arrestuar nga autoritetet turke.
Sipas prokurorisë së Stambollit dhe raportimeve të agjencisë shtetërore Anadolu, arrestimet janë kryer në 43 nga 81 provincat e vendit, përfshirë Stambollin dhe Izmirin. Gjithashtu, 18 ushtarakë të tjerë janë shpallur në kërkim.
Operacioni, që vjen pak javë pas arrestimeve të tjera në fund të majit, ka pasur në fokus kryesisht pjesëtarë të forcave tokësore të ushtrisë turke.
Fetullah Gylen, i cili ndërroi jetë në SHBA në fund të tetorit, ishte dikur aleat i ngushtë i presidentit turk Recep Tayyip Erdogan, përpara se të shpallej armik i shtetit. Ankaraja e akuzon lëvizjen e tij për infiltrime në drejtësi, ushtri, polici dhe sistemin arsimor, me qëllim krijimin e një “shteti paralel”.
Që nga viti 2016, rreth 26.000 persona janë arrestuar për lidhje me këtë lëvizje, e cila konsiderohet organizatë terroriste nga autoritetet turke. Më shumë se 9.000 prej tyre janë dënuar me burgim.
Pas vdekjes së Gylenit, presidenti Erdogan është zotuar të ndjekë ndjekësit e tij “deri në skajet më të largëta të botës”.
