Një sulm ditën e sotme nga Irani ka goditur bazën amerikane Al Udeid në Katar, e cila konsiderohet baza më e madhe amerikane në Lindjen e Mesme dhe luan një rol kyç në operacionet ajrore të SHBA-së dhe Britanisë në Gjirin Persik.
Al Udeid, e vendosur jashtë kryeqytetit Doha, është një qendër e madhe logjistike që strehon rreth 11,000 trupa amerikane dhe mbi 100 avionë luftarakë, përfshirë bombardues strategjikë B-52, avionë furnizimi me karburant KC-135, aeroplanë spiunë dhe dronë MQ-9 Reaper. Kjo bazë ka qenë pika kryesore e operacioneve ajrore amerikane dhe britanike që nga rënia e Sadam Huseinit.
Ekspertët theksojnë se një sulm ndaj kësaj baze përbën një goditje serioze, jo vetëm për kapacitetin ushtarak të SHBA-së në rajon, por edhe për sigurinë strategjike të forcave amerikane dhe aleatëve të tyre, pasi avionët e mëdhenj dhe infrastruktura logjistike janë të vështira për t’u evakuuar shpejt.
Megjithatë, një goditje e tillë mund të prishë marrëdhëniet relativisht të mira midis Teheranit dhe Dohas, duke rrezikuar stabilitetin dhe paqen në rajon.
Kjo ngjarje ndodh në një moment të tensionuar mes SHBA-së dhe Iranit, pas sulmeve të mëparshme ajrore ndaj objekteve bërthamore iraniane, që kanë rritur frikën për përshkallëzim ushtarak në Lindjen e Mesme.
Ditët e fundit, sipas disa imazheve satelitore, dhjetëra avionë luftarakë amerikanë janë zhdukur nga baza ajrore Al Udeid. Zakonisht, baza është e mbushur me avionë transporti, luftarakë dhe dronë. Kjo duket të jetë një lëvizje për të parandaluar shkatërrimin e avionëve në rast sulmi, në një rajon ku SHBA ka rreth 40,000 ushtarë.
