5 perosna janë arrestuar në Tiranë pasi dyshohet se ishin të përfshirë në një rast të shitjes së 5 kg kanabis sativa.
Policia bën me dije mes të arrestuarve janë dhe dy vëllezër. Gjithashtu mësohet se gjatë operacionit shërbimet e Policisë kanë ndaluar në Valias, 2 automjetet e dyshuara, automjetin tip “Audi” dhe automjetin tip “Jaguar”.
Të arrestuarit janë shtetasi Alban Prendi, 25 vjeç, akuzohet për “Prodhimi dhe shitja e narkotikëve”, kurse Erjan Perlleshi, 26 vjeç; Elsad Germaj, 22 vjeç; Shaban Nikolli(Germaj), 20 vjeç dhe Egzon Buzalli, 23 vjeç, akuzohen për “Moskallëzimi i krimit”.
Në njoftim thuhet se të dyshuarit tentuan të largoheshin në momentin e ndërhyrjes së Policisë. Ndërkohë gjatë kontrollit në automjetin tip “Audi” shërbimet e Policisë kanë gjetur 2 pako me lëndë të dyshuar narkotike kanabis Sativa, me peshë totale 5 kilogramë e 300 gramë, që dyshohet se po transportohej me qëllim shitjen.
“Specialistët për Hetimin e Krimeve të Komisariatit të Policisë Nr. 5, në vijim të operacioneve të njëpasnjëshme për goditjen e veprimtarive kriminale, kanë finalizuar një tjetër operacion për goditjen e një rasti të tentativës për të shitur lëndë narkotike. Si rezultat i operacionit të koduar “Valiasi”, u arrestuan në flagrancë shtetasit:
-A. P., 25 vjeç, për veprën penale “Prodhimi dhe shitja e narkotikëve”;
-E. G., 22 vjeç, Sh. N.(G.), 20 vjeç (vëllezër), E. P., 26 vjeç dhe E. B., 23 vjeç, për veprën penale “Moskallëzimi i krimit”.
Gjatë operacionit, bazuar në informacionet e siguruara nga burimet operative, shërbimet e Policisë kanë ndaluar në Valias, 2 automjetet e dyshuara, automjetin tip “Audi” me drejtues shtetasin A. P. dhe pasagjer shtetasin E. P. dhe automjetin tip “Jaguar” që e ndiqte nga pas, me drejtues shtetasin E. B. dhe pasagjerë shtetasit Sh. N.(G.) dhe E. G, të cilët tentuan të largoheshin në momentin e ndërhyrjes së Policisë.
Gjatë kontrollit në automjetin me drejtues shtetasin A. P., shërbimet e Policisë kanë gjetur 2 pako me lëndë të dyshuar narkotike Cannabis Sativa, me peshë totale 5 kilogramë e 300 gramë, që dyshohet se po transportohej me qëllim shitjen”, njofton policia.
