Policia e Tiranës ka zbuluar një ambient në zonën malore të fshatit Mukje, i përshtatur për tharjen e bimëve narkotike dhe përgatitjen e tyre për shitje.
Si rezultat është arrestuar organizatori i kësaj veprimtarie kriminale. Në kuadër të operacionit të koduar “Improvizimi” është vënë në pranga shtetasi J. M., 42 vjeç. Gjithashtu, ka nisur procedimi penal në gjendje të lirë dhe për shtetasin B. M., 59 vjeç.
“42-vjeçari dyshohet se kishte improvizuar një ambient në territorin malor të fshatit Mukje, të cilin e kishte përshtatur për tharjen e bimëve narkotike dhe përgatitjen e tyre për shitje, ndërsa shtetasi B. M. dyshohet se kishte dijeni për këtë veprimtari dhe nuk e kishte kallëzuar.
Gjatë kontrollit, nga ky ambient u sekuestruan 516 gramë lëndë e dyshuar narkotike Cannabis Sativa.” – thuhet në njoftimin e Policisë.
Materialet procedurale i janë referuar Prokurorisë së Tiranës, për veprime të mëtejshme.
