Klodian Muço, ekspert i ekonomisë, ka ngritur shqetësime lidhur me zhvillimet demografike dhe ndikimin e tyre në sektorin e ndërtimit dhe atë bankar në vend.
Muço theksoi se Shqipëria po përballet me një tkurrje të vazhdueshme të popullsisë dhe një plakje alarmante të saj, ndërkohë që në mënyrë paradoksale, në Tiranë vazhdojnë të jepen leje ndërtimi në përmasa rekord.
Në këtë kontekst, Muço vë në dukje se Banka e Shqipërisë po merr masa për të mbrojtur sektorin bankar, i cili mund të përballet me sfida serioze nëse kjo situatë nuk trajtohet me kujdes
“Bankat, në vetvete janë institucione financiare që në shumicat e vendeve që operojnë në Shqipëri, janë prej qindra e vitesh në shtetet e tyre, kështu që janë institucione financiare me një rëndësi të veçantë që për të operuar në treg normalisht marrin një sërë masash për të qenë prudenciale. Dhe Banka e Shqipërisë nga ana tjetër bën analizat e saj. Por çfarë janë këto analiza në vetvete.
Konkretisht, ne shikojmë që kemi një tkurrje të popullsisë në Shqipëri. Të dhënat e fundit të INSTAT, na nxorrën që edhe popullsia në Tiranë kishte tendencë rënëse, ndryshe nga vitet e kaluara ku popullsia në Tiranë rritej si pasojë e prurjeve që vinin nga qytetet e tjera. Ndërsa vitin e kaluar edhe Tirana ishte rënëse.
Nga ana tjetër të dhënat e Eurostatit të thotë që popullsia të është plakur me ritme dramatike, që tregon se tentencat për popullsinë e Shqipërisë janë të plaket gjithmonë e më tepër. Të rinjtë që e kanë të vështirë të ndërtojnë jetën e tyre në Shqipëri për arsye që e kemi përmendur me dhjetëra herë.
Shqipëria është një vend jo shumë atraktiv për të rinjtë. Në të tilla kushte, kalojmë tani tek sektori i ndërtimit. Çfarë është vënë re?
Nga njëra anë shikojmë që popullsia ka trend rënës. Në Tiranë popullsia po bie, nga ana tjetër lejet e ndërtimit po rriten në nivele të frikshme. Vitin e kaluar, në Tiranë u dhanë mbi 8 milionë metra katror leje ndërtimi, që nënkupton se ndërtohen rreth 10 mijë apartamente në vit. Banka e Shqipërisë, duke patur gjithë këta tregues, nis e mbron sektorin bankar”, tha Klodian Muço per SYRI TV.
