Mehdi Taremi nuk i është bashkuar dot Inter-it në Amerikë për Kupën e Botës për Klube, pasi sulmuesi iranian është bllokuar në Teheran, për shkak të ndalimit të fluturimeve si pasojë e situatës mes Iranit dhe Izraelit.
Në sezonin e tij të parë si zikaltër, Taremi shënoi në 9 gola në 43 ndeshje në të gjitha kompeticionet, duke mos dhënë rendimentin që pritej prej tij. Duke parë edhe situatën aktuale të lojtarit, drejtuesit e klubit zikaltër po mendojnë për largimin e sulmuesit iranian, por edhe në rast qëndrimi, do jetë sulmuesi i katërt.
Në këtë situatë, klubi zikaltër po mendon për të transferuar një sulmues të ri gjatë merkatos verore, për të qenë alternativa kryesore pas dyshes titullare Martinez-Thuram.
“La Gazzetta dello Sport” raporton se Inter ka në listë dy emra, i pari, i cili është dëshira e madhe e drejtuesve zikaltër, është Rasmus Højlund, sulmuesi danez i Manchester United.
22-vjeçari ka qenë për një sezon pjesë e Serisë A me Atalantën, para se të transferohej në vitin 2023 te Manchester United për 45 milionë euro. Në dy sezonet e tij të para te “Djajtë”, Hojlund ka shënuar 23 gola, por nuk ka arritur dot të jetë një titullar fiks.
Inter kërkon të përfitojë nga situata e tij aktuale te Manchester United dhe do provojë transferimin e tij. Propozimi i parë i zikaltërve do jetë huazim me të drejtë blerjeje, gjë që vështirë se do pranohet nga Man. United. Gjithsesi, mbetet për t’u parë si do shkojnë bisedimet mes dy klubeve.
Zgjedhja e dytë e Inter-it është një sulmues brenda Serie A, bëhet fjalë për francezin e Parmës, Ange-Yoan Bonny, i cili është vetëm 21 vjeç dhe konsiderohet si një lojtar me potencial për të ardhmen.
