Policia në Durrës ka arrestuar një 51-vjeçar, pasi i ka dhënë mjetin lundrues të tipit “Jet ski” 21-vjeçarit belg, që u plagos ditën e djeshme pas një aksidenti ujor.
“Specialistët për Hetimin e Krimeve të Stacionit të Policisë Plazh arrestuan në flagrancë shtetasin S. Xh., 51 vjeç, banues në Tiranë, për veprat penale “Shkelja e rregullave të mbrojtjes në punë” dhe ‘Veprime që pengojnë zbulimin e së vërtetës’”, informon policia.
Nga veprimet hetimore të kryera për ngjarjen e ndodhur ditën e djeshme, në zonën e quajtur “Shkëmbi i Kavajës”, rezultoi se “shtetasi S. Xh. i ka dhënë me qira një mjet lundrues Jet Ski, pa masat e sigurisë të nevojshme, shtetasit belg H. K., i cili nuk është i pajisur me leje drejtimi për këtë kategori mjetesh”.
Mjeti lundrues, të cilin e drejtonte dikush tjetër ka humbur kontrollin dhe ka rënë në ujë, duke lënë të plagosur rëndë të riun.
Ai ka marrë plagë të rënda dhe më pas është dërguar në spitalin e Durrësit për të marrë ndihmë mjekësore, më pas ai është transportuar në spitalin e Traumës për të marrë ndihmë mjekësore të specializuar, ku Policia bën me dije se ndodhet në gjendje të rëndë shëndetësore.
