Politologu Ilir Kalemaj tha në edicionin e lajmeve në MCN Tv se sulmi i Izraelit ndaj Iranit, mund të ketë përfitime afatshkurtra për Netanjahun, por rrezikon ta fusë rajonin në një spirale të rrezikshme, me kosto të mëdha dhe të paplanifikuara.
Kalemaj tha se ka analistë që mendojnë që ky sulm mund ta legjitimojë Iranin dhe vendet e Gjirit që të zhvillojnë armë bërthamore.
“Sulmi i Izraelit ishte kronika e një ngjarje të paralajmëruar sepse jo vetëm për faktin që Izraeli dhe Irani janë dy superfuqi rajonale, me mospajtueshmëri prej më shumë se 3-4 dekadash. Operacioni qoftë ai ndaj Hezbollahut, qoftë ky ndaj Iranit, ishin planifikuar shumë vite më parë. Ishin futur brenda, kishin ndërtuar një fabrikë dronesh, ishin nxjerrë jashtë loje ajo pjesë që kishte mbetur nga mbrojtja kundër ajrore e Iranit, që tregojnë një planifikim afatgjatë nga Mossad-i apo Shin Bet-it, që janë shërbimet inteligjente të Izraelit, dhe kjo e ka çuar konfliktin në nivelet më alarmante, jo vetëm për këto dy vende, por për gjithë rajonin e Lindjes së Mesme.
Kemi një reagim të vendeve të Gjirit, vendeve arabe, Turqisë, që e shohin me shumë shqetësim pjesën e planit Izraelit, për të shkaktuar një destabilizim rajonal, pavarësisht se ky i fundit është përpjekur t’i qetësojë vendet arabe, Turqinë, duke thënë se Irani përbën kërcënim për të gjithë ata dhe duke hequr qafe një armik të rrezikshëm që ishte në prag të zhvillimit të armës bërthamore.
Po të lexosh 100 analiza ndërkombëtare, s’e gjen asnjëherë kush është e vërteta në mënyrë të pastër dhe të kristaltë, sepse askush s’e ka informacionin e plotë, dhe varet nga këndvështrimi. Izraeli kishte interesa strategjike për të përshkallëzuar në këtë moment situatën. Mund të ishte e vërtetë që Irani për punë javësh por edhe ditësh mund të zhvillojë armë bërthamore, kjo mund të qëndrojë…Megjithatë ka diskutim teknik sa kjo mund të përdoret.
Kishte analiza sot që thoshin që kjo mund të çojë në situatë spirale, në vend ta parandalojë Iranin të zhvillojë armë bërthamore, mund ta legjitimojë Iranin që të zhvillojë armë bërthamore, sepse sipas ekspertëve s’është cenuar baza më e rëndësishme, ku është e vështirë për të depërtuar për shkak të fortifikimit beton brenda mali, ku po zhvillohet pjesa më e madhe e pasurimit të uraniumit, dhe vendet e Gjirit mund të zhvillojnë armë bërthamore nga Turqi, Arabi Saudite, duke vazhduar me Egjiptin, dhe kjo gjë do ishte në kundërshtim me dëshirën dhe vullnetin Izraelit për të patur monopolin e armës bërthamore në një rajon ku numerikisht janë inferiorë, vetëm 10 milionë.
Duke zhvendosur vëmendjen në një front të ri, mund t’i sjellë përfitime afatshkurtra vet regjimit të Izraelit, përfshi Netanjahut, por mund të ketë kosto të mëdha të papalanifikuara, një spirale të rrezikshme për gjithë stabilitetin rajonal, jo vetëm Iranin”.
