Teksa po përballemi me ditët e nxehta të verës, zgjidhja më e shpejtë dhe e përdorur nga qytetarët janë kondicionerët. Të dhënat e siguruara nga Drejtoria e Përgjithshme e Doganvae, tregojnë se vetëm në 5 muajt e parë të vitit, janë importuar kondicionerë me një vlerë prej 3 miliardë e 47 milionë lekë.
Ndërsa, vetëm në muajin maj janë importuar 952 milionë lekë kondicionerë. Por e përkthyer në peshë, doganat përllogarisin se janë importuar rreth 3.8 milionë kg kondicionerë për periudhën janar-maj të këtij viti.
Duke e krahasuar me të njëjtën periudhë të vitit të kaluar, importi është rritur me 411.6 milionë lekë, çka tregon rritje të kërkesës për këto pajisje. Ndërsa në peshë, janë rreth 840 mijë kg më shumë se 5 muajt e parë të vitit të kaluar.
Por, si varijojnë çmimet e kondicionerëve? Nga një vëzhgim që Scan Tv realizoi, shumë nga dyqanet e pajisjeve elektroshtëpiake kanë nisur të reklamojnë uljet, të cilat variojnë nga 20%-50% ulje. Ndërsa çmimet variojnë nga 22 mijjë lekë për kondicionerë 12.000 BTU, deri në 120.000 për kondicionerë 24.000 BTU.
Aktualisht, Shqipëria nuk e ka një industri të mirëfilltë për prodhimin e kondicionerëve, por sigurimi i tyre operohet përmes disa kompanive që i importojnë. Ndërsa një nga shtetet që importojmë më shumë kondicionerë, mbetet Kina./SCAN
