Presidenti serb Aleksandër Vuçiç nuk ka pranuar të nënshkruajë deklaratën anti-ruse për sanksione të përbashkëta ndaj Rusisë që u hartua dje në Samitin Ukrainë-Evropë Juglindore në Odessa të Ukrainës.
Në samit morën pjesë 11 zyrtarë të vendeve të ndryshme, të gjithë e nënshkruan deklaratën përveç Vuçciçit.
Vuçiç deklaroi para mediave serbe, se nënshkrimi i deklaratës anti ruse, siç e cilësoi ai, nuk ishte diçka e thjeshtë për Serbinë.
“Isha i vetmi që nuk pranova Deklaratën, ndryshe nga pjesëmarrësit e tjerë në samit që janë gati të pranojnë gjithçka që iu udhëzohet kundër Rusisë,” nënvizoi presidenti serb.
Vizita e Vuçiç në Ukrainë, e para që zhvilloi në atë vend që kur mori detyrën e presidentit të Serbisë rreth një dekadë më parë, u zhvillua pasi shërbimi rus i inteligjencës së jashtme akuzoi kompani serbe të prodhimit të armëve se po përpiqeshin t’i ngulnin një thikë pas shpine Rusisë, duke i shitur municione Kievit.
