Nga Boldnews.al
Prej disa vitesh, bastet në Shqipëri janë shndërruar në një objekt të paligjshëm dhe Policia e Shtetit raporton periodikisht për arrestimin e individëve që kanë në telefonat e tyre faqe interneti për garat sportive apo që luajnë në tavolina pokeri të fshehura në garazhe apo bodrume ndërtesash.
Policia kërkon të shpërndajë bindjen se është e vendosur për të luftuar ata, të cilët kryeministri Edi Rama i konsideron si “njerëz me vese, që shkatërrojnë financat e familjeve të tyre për baste”.
Por, realiteti në praktikë është shumë më ndryshe se sa propagandohet. Rasti më tipik është zona e “Ali Demit” në Tiranë.
Një nga lagjet që ka marrë një zhvillim të fuqishëm urban gjatë viteve të fundit, është shndërruar në një lloj “parajse” për bastet e paligjshme. E gjitha ndodh në sytë e punonjësve të Policisë, të cilët ushtrojnë detyrat në territorin që mbulon Komisariati nr.1, në Tiranë, të drejtuar nga Robert Losha.
Një vëzhgim i “Boldnews.al” tregon se në zonën e “Ali Demit” gjenden një seri lokalesh, të branduara me logon “333” dhe “CR7”. Të apasionuarit e basteve sportive e kanë shumë të qartë që këto lokale shërbejnë si kamuflim për baste të paligjshme.
Por, policët e Robert Loshës duket se e kanë bezdi që të kthejnë kokën nga këto lokale. Madje, mundohen të mohojnë ekzistencën e tyre, edhe kur në këto lokale zhvillohen ngjarje të rënda kriminale.
Në fund të prillit 2025, një ngjarje e rëndë ndodhi në ambjentet e një prej lokaleve me logon “333” në zonën e Ali Demit.
Dy persona, babë e bir, kanë goditur dhe dhunuar një individ, me emrin Lendi Palaj, i njohur gjerësisht si “menaxher” i rrjetit të lokaleve “333”.
Pamjet e publikuara në media treguan se dy agresorët, Arjan Telhallari dhe djali i tij, Lorenc Telhallari, shkuan të armatosur në sherr, por, fatmirësisht, nuk u përdor arma kundër objektit të tyre.
Drejtuesi i Komisariatit nr.1 në Tiranë, Robert Losha, në një njoftim të shpërndarë në media, tentoi të manipulonte motivin e ngjarjes, duke deklaruar se vendi i sherrit ka qenë pranë një zyre elektorale të Partisë Social-Demokrate.
Ky lloj informimi i shtrembëruar, me sa duket, synonte të fokusonte konfliktin tek arsyet politike, meqenëse vendi ishte në kulmin e fushatës elektorale për zgjedhjet parlamentare të 11 Majit 2025.
Por, deklaratat e Loshës dhe komisariatit që ai drejton u përgënjeshtruan menjëherë nga raportimet mediatike, të cilat zbuluan se shkaku i konfliktit ishin bastet dhe borxhet që ato kanë krijuar.
Në atë rast, Robert Losha, jo vetëm që nuk guxoi të prekte lokalet e basteve të paligjshme, por, përkundrazi, nëpërmjet njoftimit zyrtar, tentoi të manipulonte opinionin publik për shkaqet reale të konfliktit mes Palajt dhe familjarëve Telhallari.
Rreth dy muaj pas asaj ngjarje, pikërisht në mbrëmjen e 10 Qershorit 2025, një tjetër konflikt i dhunshëm ndodhi në zonën e “Ali Demit”, me përfshirjen e të paktën pesë personave në përleshje fizike, por me dyshimet se janë përdorur edhe armë.
Policia e Tiranës, nëpërmjet të dhënave të siguruara nga Komisariati nr.1, publikoi një njoftim të thatë për ngjarje, pa dhënë asnjë arsye apo shkak për konfliktin.
Deri në momentin e publikimit të këtij shkrimi, arsyeja e konfliktit nuk është shpjeguar zyrtarisht, megjithatë, burime të ndryshme mediatike ngrenë dyshimin se sherri është zhvilluar për shkak të basteve të paligjshme, të cilat zhvillohen lirshëm në zonën që mbulon Robert Losha, duke u shndërruar po aq lehtësisht në skena krimi.
