Teksa jemi futur në sezonin turistik, duket se në Vlorë djegja e plehrave në fushën e mbetjeve, i jep një goditje të rëndë imazhit të qytetit bregdetar.
Në një video të publikuar në rrjetet sociale, vërehet se për shkak të zjarrit në fushën e mbetjeve, qyteti bregdetar është mbuluar nga tymi kancerogjen.
Po ashtu reagime ka pasur edhe nga Partia Demokratike në lidhje me zjarrin në fushën e mbetjeve.
Ish-kandidati i opozitës për zgjedhjet e 11 majit, Atird Hoxha, shkruan se në kulmin e sezonit turistik, qyteti mbulohet nga tymi kancerogjen, dhuratë nga paaftësia dhe papërgjegjshmëria e kësaj qeverie.
Më tej, Hoxha shkruan se landfilli i Sherishtës, që ka përpirë mbi 10 milionë euro nga paratë e shqiptarëve, vazhdon të jetë joefikas dhe jofunksional, ndërsa Rama “shkëlqen” me propagandë, ndërsa Vlora mbytet në plehra e helm.
“Sërish zjarr në fushën e mbetjeve në Vlorë!
Në kulmin e sezonit turistik, qyteti mbulohet nga tymi kancerogjen, dhuratë nga paaftësia dhe papërgjegjshmëria e kësaj qeverie.
Ndërkohë, Landfilli i Sherishtës, që ka përpirë mbi 10 milionë euro nga paratë e shqiptarëve, vazhdon të jetë joefikas dhe jofunksional. Mashtrim me firmë dhe vulë!
Rama “shkëlqen” me propagandë, ndërsa Vlora mbytet në plehra e helm.
Dhe për ata që ende e votojnë këtë turp… duket se i pëlqejnë më shumë plehrat sesa zhvillimi.
Në këtë ritëm, turistët e vetëm që do shohim në Vlorë do jenë klientët e qeverisë, që pasi morën çfarë deshën, tani po tjetërsojnë edhe vilat qeveritare, gjë që as diktatori Hoxha nuk guxoi ta bënte!”, shkruan ai në Facebook.
Ndërsa deputeti demokrat Edi Paloka, i cili ka shpërndarë postimin e Hoxhës, thumbon me fjalët: “Ah mor Sali Berisha…dhe kete e bere ?!”
