Një 14-vjeçar është ndaluar nga policia gjermane me akuzën e terrorizmit. Sipas mediave gjermane, i riu, i njohur më parë nga forcat e rendit për publikimin e videove që mbështesin Shtetin Islamik në rrjetet sociale, dyshohet se kishte planifikuar të kryente një sulm në Këln.
Ministri i Brendshëm i Rajonit Renania-Veriore-Vestfalia ka deklaruar për gazetën gjermane Bild se “14-vjeçari jo vetëm ka përhapur propagandën e Shtetit Islamik në rrjetet e tij sociale, por gjithashtu ka shprehur fantazi sulmesh”.
Autoritetet vazhdojnë hetimet për të kuptuar nëse ka persona të tjerë të përfshirë dhe për të vlerësuar rrezikun real të kërcënimit.
Ky rast ka ndezur sërish debatet në Gjermani mbi radikalizimin e të rinjve dhe rreziqet nga përhapja e përmbajtjeve ekstremiste në internet.
