Voltan Xhani, njëri nga personat e arrestua nga policia në Durrës, si i përfshirë në vrasjen e Elis Rroshkodolit, do përballet me një hetim të SPAK, pasi prej disa kohësh dosja e ekzekutimit në 30 Gusht 2024 të Rroshkodolit, i ka kaluar për verifikime të mëtejshme Prokurorisë së Posaçme.
Vendimi për transferimin e dosjes hetimore është marrë nga Prokuroria e Shkodrës, e cila ka argumentuar se 4 personat e proceduar, dy të arrestuar dhe dy në kërkim, kanë siguruar mjetet dhe kushtet në formën e grupit të strukturuar kriminal me qëllim vrasjen e Elis Roshkadolit.
Aktualisht, dy personat e arrestuar janë Xhulio Malo dhe së fundi Voltan Xhani. Ndërsa dy personat e tjerë që vijojnë të jenë në kërkim janë më inicialet J.Xh dhe D.M.
Voltan Xhani prej muajit Shtator të vitit 2024 ishte shpallur në kërkim nga prokuroria e Shkodrës, por ai u arrestua nga RENEA teksa ishte duke ngrënë krudo dhe karkaleca me dy persona me rrezikshmëri si Flobenc Gega dhe Xhevdet Plaku.
Të katër personat akuzohen për “Sigurimin e kushteve dhe mjeteve me qëllim kryerjen e vrasjes”, “Veprime që pengojnë zbulimin e së vërtetës” dhe “Trafikimi i mjeteve motorike”, kryer në bashkëpunim, “Vrasja me paramendim”, “Mbajtja pa leje dhe prodhimi i armëve” vepra këto të kryera në formën e Grupit të strukturuar kriminal”.
Tashmë hetimi për këto akuza dhe 4 personat do vijojë të ndiqet nga një prokuror i posaçëm në SPAK./Ora News
