Sipas Trump, këto tarifa doganore të reja do të jënë më efektive në luftën kundër prodhimit të tepërt me kosto të ulët nga jashtë që dëmton konkurrueshmërinë e industrive amerikane të çelikut dhe aluminit.
Presidenti i SHBA, Donald Trump ka nënshkruar urdhrin ekzekutiv që rrit tarifat doganore të vendosura për importet e çelikut dhe aluminit, dy sektorë që konsiderohen strategjikë, nga 25% në 50%, raporton Corriere della Sera. Urdhri ekzekutiv specifikon se tarifat e reja hynë në fuqi sot në orën 00:01 me orën lokale.
“E kam konsideruar të nevojshme rritjen e tarifave për çelikun dhe aluminin në mënyrë që të rregullohen importet për t’u siguruar që ato të mos rrezikojnë sigurinë kombëtare”, thuhet në urdhër ekzekutiv.
Sipas presidentit të SHBA-së, “këto tarifa të reja do të jenë më efektive në luftën kundër prodhimit të tepërt me kosto të ulët nga jashtë që dëmton konkurrueshmërinë e industrive amerikane të çelikut dhe aluminit”.
Rritja vlen për të gjithë partnerët tregtarë përveç Britanisë, i vetmi vend deri më tani që ka arritur një marrëveshje paraprake tregtare me SHBA-në gjatë një pauze 90-ditore të një game më të gjerë tarifash të Trump. Norma për importet e çelikut dhe aluminit nga Mbretëria e Bashkuar, e cila nuk renditet ndër eksportuesit kryesorë të asnjërit metal në SHBA, do të mbetet në 25% deri të paktën më 9 korrik.
Rreth një e katërta e të gjithë çelikut të përdorur në SHBA importohet dhe të dhënat tregojnë se rritja e taksave do t’i godasë veçanërisht rëndë partnerët më të afërt tregtarë të SHBA-së – Kanadanë dhe Meksikën. Ato renditen përkatësisht në vendin e parë dhe të tretë për nga vëllimet e dërgesave të çelikut në SHBA.
Ky vendim ka të ngjarë të mos i godasë menjëherë xhepat amerikanë, por ekspertët thonë se çmimet më të larta në projektet e ndërtimit, parkingjet e makinave, pajisjet dhe gjetkë janë pothuajse të pashmangshme nga tarifat më të larta. Dhe ndërsa tarifat mund të mbrojnë vendet e punës në prodhimin e çelikut, ato mund të dëmtojnë punësimin në industri shumë më të mëdha. Por administrata thotë se tarifat janë thelbësore për sigurinë kombëtare dhe ekonominë.
“Prodhimi vendas i çelikut dhe aluminit është i domosdoshëm për bazën tonë industriale të mbrojtjes”, tha zëdhënësi i Shtëpisë së Bardhë, Kush Desai për CNN. “Administrata Trump është e përkushtuar për të rivendosur prodhimin që është kritik për sigurinë tonë kombëtare dhe ekonomike, duke nisur një sërë reformash në anën e furnizimit – duke përfshirë derregullimin e shpejtë, uljen e taksave dhe çlirimin e energjisë amerikane – për të vazhduar të ofrojë lehtësim ekonomik për popullin amerikan.”
Tarifa prej 25% për importet e çelikut dhe aluminit nga Shtetet e Bashkuara hyri në fuqi në mesin e marsit. Ishte një nga vendimet e para për këtë çështje nga Donald Trump që nga kthimi i tij në Shtëpinë e Bardhë. Të premten e kaluar, presidenti amerikan njoftoi më pas dyfishimin e tarifave doganore për këto metale, duke siguruar se “industritë tona të çelikut dhe aluminit do të jenë më të forta se kurrë”.
Komisioni Evropian reagoi menjëherë, duke e dënuar këtë vendim i cili minon “përpjekjet e vazhdueshme për të arritur një zgjidhje të negociuar” me Shtetet e Bashkuara.
Kanadaja, furnizuesi më i madh i Shteteve të Bashkuara, paraqiti një ankesë në Organizatën Botërore të Tregtisë (OBT) më 13 mars, e cila i quajti këto masa “të papajtueshme me detyrimet e Shteteve të Bashkuara” në aspektin e tregtisë ndërkombëtare.
