Për një ditë paraburgosje të padrejtë shteti është i detyruar të paguajë tre mijë lekë dëmshpërblim.
Por me këtë vlerë nuk është dakord dhoma e avokatisë Shkodër që kërkon ndryshim të vlerës së kompensimit në kushtet kur po vëren shtim të padive për burgosjen e padrejtë.
“Kuvendi i Shqipërisë duhet të ndërhyjë, ta bëjë në proporcion edhe me nivelin e ekonomik të sotëm çmimet dhe nevojat e qytetarëve. Ne kemi bërë disa mbledhje ku kemi sugjeruar disa ndryshe në kodin e procedurës”, tha kreu i dhomës së avokatisë Shkodër, Antonm Kosteri per Top Channel.
Kjo duhet bërë edhe për çështjet kur shtetasi i dyshuar është mbajtur nën arrest shtëpie, ose ka qëndruar në burg më tepër se sa e ka dënuar gjykata, rasti i fundit lidhet sipas avokatit me tejzgjatjet e proceseve.
“Kemi shumë çështje, kemi akoma në Gjykata e Apelit që po shqyrtohen në shkallën e parë para 5 vitesh, dhe ende janë pa vendim të formës së prerë”, tha ai.
Po ashtu shtetasit kanë të drejtë të kërkojnë kthim në detyrën që mund të kenë humbur për shkak të paraburgosjes apo dënimit , por që në fund drejtësia I ka shpallur të pafajshëm apo e ka pushuar çështjen.
