Pasi KLGJ deklaroi përfundimin e statusit të magjistratit për gjyqtarin e Vlorës, Arqile Basho, për shkak të arritjes së moshës së pensionit, KPA përmbylli vetingun e tij pa një vendim përfundimtar, me argumentin se qëllimi i procesit të rivlerësimit kalimtar për këtë subjekt është bërë i pamundur.
Kolegji i Posaçëm i Apelimit, KPA, vendosi të hënën, më 2 qershor, të përfundojë procesin e vetingut për gjyqtarin e Vlorës, Arqile Basho, pa një vendim përfundimtar. Basho u shkarkua nga detyra më 15 dhjetor 2021 nga Komisioni i Pavarur i Kualifikimit, KPK, për pamundësi në krijimin e pasurive, fshehjen e dy apartamenteve dhe të një aktiviteti, si dhe për cënim të besimit të publikut.
Basho e ankimoi vendimin e Komisionit pranë Kolegjit, i cili, me shumicë votash, vendosi të përfundojë procesin e rivlerësimit kalimtar për Bashon pa vendim përfundimtar, me arsyetimin se objekti dhe qëllimi i këtij procesi është bërë i pamundur. Vendimi u mor nga trupi gjykues i KPA-së, i kryesuar nga Sokol Çomo, me relatore Albana Shtyllën dhe anëtare Ina Rama, Mimoza Tasi dhe Natasha Mulaj, pas gjykimit në dhomë këshillimi të ankimit të Bashos.
Arqile Basho e filloi karrierën në sistemin e drejtësisë në vitin 1995 si ndihmës gjyqtar dhe në vitin 2000 u emërua gjyqtar. Ai e ushtroi funksionin në gjykatat e Tepelenës, të Gjirokastrës dhe, prej vitit 2011 deri në largimin nga detyra, në Gjykatën e Rrethit Gjyqësor Vlorë.
Në muajin janar, Këshilli i Lartë Gjyqësor, KLGJ, rrëzoi kërkesën e Bashos për ta lejuar të qëndronte në detyrë deri në moshën 70-vjeçare. Kur u trajtua kërkesa e Bashos nga KLGJ, ai ishte i pezulluar nga detyra për shkak të shkarkimit në shkallën e parë të vetingut. KLGJ konstatoi se Basho nuk e ushtronte efektivisht detyrën dhe, për rrjedhojë, u konsiderua e pamundur të vlerësohej efikasiteti i tij në punë.
Më 15 janar, përveç rrëzimit të kërkesës së Bashos për shtyrjen e daljes në pension deri në moshën 70 vjeç, KLGJ vendosi të deklarojë edhe përfundimin e statusit të magjistratit për këtë subjekt rivlerësimi – vendimmarrje që e jepte efektin nga data 31 janar, kur ai mbushte moshën e pensionit./BIRN
Video/ “Qen bir qeni!” Qytetari kap për leckash gjyqtarin brenda gjykatës në Vlorë
KLGJ mbyll pa vendim procedimet ndaj tre gjyqtarëve të shkarkuar
