Nga BoldNews.al
Një situatë absurde, madje edhe skandaloze, është zhvilluar paraditen e sotme (E Enjte, 15.07.2021) në Gjykatën e Vlorës.
Një qytetar, i cili është irrituar nga një vendim civil i gjyqtarit Arqile Basho, e ka ndjekur këtë të fundit në korridoret e ndërtesës së drejtësisë, duke e akuzuar për “shitje vendimi”, si edhe duke e kapur me forcë prej “togës së zezë”.
Në videon e siguruar nga “Boldnews.al”, dëgjohet një qytetar, i cili i drejtohet me fjalë të ashpra Bashos, si edhe duke e akuzuar për një vendim skandaloz.
Nga ajo që ka mësuar redaksia, rasti që ishte në shqyrtim nga gjyqtari Basho lidhet me pronësinë e një trualli, në të cilën është dhënë leje ndërtimi për një godinë.
Qytetari i irrituar, me sa kuptohet, ka humbur procesin gjyqësor dhe për këtë akuzon gjyqtarin Arqile Basho se ka marrë para për të arritur në atë konkluzion.
Por, megjithëse irritimi i qytetarit mund të ketë një bazë reale, sjellja dhe reagimi i tij është me të vërtetë i tepruar, aq më tepër në ambjentet e sallës së gjyqit dhe më tej në korridoret e gjykatës.
Qytetarët shqiptarë, sidomos ata që kanë probleme me pronat, kanë shumë vite që enden në dyert e drejtësisë dhe kjo i ka bërë që të humbasin durimin.
Megjithatë, zgjidhja e vetme ligjore është ankimi në një shkallë më të lartë gjyqësore dhe kërcënimi apo cënimi i integritetit fizik të gjyqtarit nuk mund t’i ndihmojë aspak për të fituar të drejtën e pretenduar.
DENONCO