Arabia Saudite ka intensifikuar masat e sigurisë për Haxhin e këtij viti, që pritet të nisë të mërkurën, një vit pas vdekjes së 1 mijë e 301 personave për shkak të temperaturave ekstreme gjatë pelegrinazhit në Mekë.
Me më shumë se 1 milion pelegrinë që do të mbërrijnë në Mbretërinë Saudite në kushte të nxehtësisë së lartë, autoritetet kanë forcuar sigurinë rreth Mekës për të parandaluar hyrjen e pelegrinëve pa leje në qytetin e shenjtë.
Për të lehtësuar efektet e temperaturave ekstreme, që mund të arrijnë deri në 50°C, autoritetet kanë mbjellë 10 mijë pemë, kanë vendosur 400 ftohës uji dhe përdorin makineri me mjegull për freskim.
Qeveria ka njoftuar vazhdimisht përmes billboard-eve, rrjeteve sociale dhe televizionit se pelegrinët pa leje do të përballen me gjobë të rritur prej 5 mijë dollarësh — dyfishin e vitit të kaluar — dhe ndalim hyrjeje për 10 vjet.
Shumica e të vdekurve nga lodhja dhe nxehtësia vitin e kaluar ishin pelegrinë të pa regjistruar, të cilët nuk kishin akses në strehim adekuat dhe shërbime bazë gjatë nxehtësisë.
Autoritetet e sigurisë kanë ndaluar hyrjen në Mekë të 269 mijë 678 personave pa leje dhe kanë gjobitur mbi 23 mijë banorë sauditë për shkelje të rregullave të Haxhit, si dhe kanë revokuar licencat e 400 kompanive të Haxhit.
Në vitet e fundit, promovimi i turizmit fetar është pjesë e strategjisë së Princit të Kurorës Mohammed bin Salman për diversifikimin ekonomik, larg varësisë nga nafta.
Disa ekspertë thonë se çmimet e larta të paketave të Haxhit dhe lista e gjatë e pritjes në sistemin e kuotave për vende kanë rritur numrin e pelegrinëve të pa regjistruar.
Përveç pemëve dhe makinerive me mjegull, autoritetet po zgjasin përdorimin e “rrugëve të bardha”, të asfaltuara me materiale të ricikluara që ulin përthithjen e nxehtësisë nga dielli.
Një flotë e re dronësh do të transmetojë video në kohë reale në një aplikacion me inteligjencë artificial, për të monitoruar lëvizjen e pelegrinëve duke pasur parasysh ngjarjen tragjike të vitit 2015 ku vdiqën 2 mijë e 300 pelegrinë.
Në fenë islame, Haxhi konsiderohet si shtylla e pestë e Islamit dhe është obligim për çdo mysliman të rritur që ka mundësi fizike dhe financiare ta kryejë të paktën një herë në jetë. Rreth 1.5 milion pelegrinë marrin pjesë çdo vit në Haxh, që përcaktohet sipas kalendarit islamik.
Ndërkaq, Umra — pelegrinazhi i vogël — mund të kryhet gjatë gjithë vitit. Qeveria synon të rrisë numrin e pelegrinëve të Umrës nga rreth 15 milionë në 30 milionë deri në vitin 2030.
