Policia e Tiranës ka raportuar arrestimin e një personi të shpallur në kërkim, me rrezikshmëri të lartë shoqërore në fushën e krimeve kundër personit.
Në kuadër të operacionit të koduar “END” është vënë në pranga shtetasi Klement Zguro alias Klement Kaçolli, 43 vjeç, banues në Tiranë. Ai është kapur në rrugën “Mikel Maruli” në kryeqytet, teksa është i dënuar me 11 vite burg, për vrasje me dashje dhe armëmbajtje pa leje.
“Gjykata e Apelit Korçë e ka dënuar këtë shtetas me 11 vite burgim, për veprat penale “Vrasja me dashje” dhe “Armëmbajtja pa leje”. 43-vjeçarit i kanë mbetur për të vuajtur 8 vite e 11 muaj burgim.” – njofton Policia.
Blutë e kryeqytetit bëjnë me dije se 43-vjeçarin ia kanë dorëzuar Policisë së Korçës për veprime të mëtejshme procedurale.
