Më 12 maj 2023 emisioni “Stop” transmetoi problemin e një pensionisti. Kolë Shkëmbi në mars të vitit 2020 doli në pension, por pensionin mujor nuk e tërhoqi për 33 muaj në degën e Postës Shqiptare nr. 30.
Kur u interesua zbuloi, se pensionin ia kishin tërhequr. Bëhej fjalë për një person me të dhëna të njëjta ID-je, por ndryshonte vetëm afati i skadencës së kartës. Shuma e munguar ishte 2 milionë e 126 mijë lekë. Pas kësaj, Kola tha së çështja vajti te krimi ekonomik dhe në Prokurori.
Specialisti i ISSH-së sqaroi se gabimi ishte bërë nga posta, pasi duhet të ishte verifikuar karta e personit, që ka tërhequr paratë. Ne komunikuam në atë kohë me drejtorin e ISSH-së dhe atë të Postës, që thanë, se këtë ngërç do ta zgjidhnin mes dy institucioneve.
Dy vjet pas këtij transmetimi, Kolë Shkëmbi tregon se pati një kallëzim nga ana e Postës në Prokurori, por Prokuroria ka pezulluar hetimet, sepse nuk gjeti autorin e këtij falsifikimi.
“Kam dy vjet që vij vërdallë pas prokurorisë dhe pas postës dhe nuk e kanë vënë ujin në zjarr fare. Posta e ka çuar çështjen tek prokuroria, kurse prokuroria e ka mbyllur çështjen. Nuk e ka gjetur autorin fare. Unë kërkoj paratë nga posta, sepse posta e ka fajin nuk duhet që paratë e njërit t’i japë tjetrit. Nuk duhet që t’i japë pensionin tim për 33 muaj tjetrit”, tha deponuesi.
Vetë Kola kërkon paratë që i takojnë, pavarësisht, se cili nga institucionet e ka fajin. Enkeleda Preçi, Përgjegjëse e Sektorit të Shërbimeve Financiare pranë Postës Shqiptare thotë se në këto kushte, posta ka marrë vendim, për t’ia kthyer pensionistit shumën e munguar, plot 2 milionë e 126 mijë lekë.
“Në këto kushte për t’i kthyer pensionin pensionistit dhe për të gjetur një zgjidhje për situatën, për ngërçin e krijuar, ne kemin kërkuar informacion zyrtar në datën 25.03.2025 pranë institucionit të prokurorisë lidhur me fazën në të cilën gjenden hetimet për rastin e Kolë Shkëmbit. Përgjigja e kthyer në prill të vitit 2025 nga prokuroria na bën me dije vendimin e janarit të këtij viti, ku është vendosur pezullimi i hetimeve për shkak të mos zbulimit të autorit. Për pos anës ligjore që ne si institucion do e ndjekim deri në fund, për shkak se përbën precedent për këtë ka ndodhur në institucionin tonë, në pjesën humane për pensionistin, Kolë Shkëmbi, Posta Shqiptare do të marrë një vendim përfundimtar. Patjetër për kthimin e shumës së munguar të pensionit”, tha Enkeleda Preçi./tvklan
