Avokati Besart Logu u shpreh se hetimet për zyrtarët e lartë të qeverisë të përfshirë në aktivitet të dyshimtë zgjedhor janë trajtuar me neglizhencë të plotë nga organet e drejtësisë.
Ai theksoi se subjektet e kallëzuara janë figura të rëndësishme politike dhe administrative, përfshirë zëvendëskryeministren Belinda Balluku dhe disa kryebashkiakë.
Sipas Logut, pamjet e publikuara nga emisioni Piranja janë prova të qarta që dëshmojnë shkelje të ligjit ku këta zyrtarë, në orar zyrtar të punës, kanë kaluar kufirin për të ndërhyrë në procesin e regjistrimit të emigrantëve në një shtet tjetër.
‘SPAK ka vepruar në mënyrë të papërgjegjshme duke shpallur moskompetencë dhe duke ia kaluar çështjen Prokurorisë së Tiranës’, shprehet ai duke theksuar se ky është një shembull i qartë i mungesës së vullnetit për të hetuar krimet zgjedhore dhe ndërhyrjet politike.
“Subjektet e kallëzuara kanë qenë: zëvendëskryeministrja Belinda Balluku, ministrja Ogerta Manastirliu, kreu i Bashkisë Fier, z. Armando Subashi, kryetarja e Bashkisë Lushnje, znj. Eriselda Sefa, si dhe kryetarja e Bashkisë Roskovec, znj. Majlinda Bufi.
Të gjithë këta zyrtarë, referuar asaj që është denoncuar nga emisioni investigativ Piranja, rezulton se, në mes të ditës dhe gjatë orarit zyrtar të punës, janë organizuar në grup, kanë kaluar kufirin dhe janë drejtuar drejt një shteti fqinj. Veprimtaria e tyre është zhvilluar përmes koordinimit me vartësit përkatës dhe përfshin regjistrime të dyshimta, në një periudhë kur ishte në vijim procesi i regjistrimit të emigrantëve në platformën zyrtare të KQZ-së.
Nga pamjet filmike të transmetuara, duken qartë dy stenda të ngritura për qarkun Vlorë dhe qarkun Fier. Vetë znj. Balluku, sipas informacioneve të publikuara, ka qenë e deleguar si drejtuese politike për qarkun Fier. Në videon e publikuar, e cila i është referuar Partia Demokratike, shfaqen gjithashtu dhe targa automjetesh, disa prej të cilave mendohet të jenë në përdorim nga institucione shtetërore.
Në këto kushte, Prokuroria do të duhej të ishte vetëinvestuar në thellimin e hetimeve. Megjithatë, kemi përballë një situatë ku Prokuroria e Posaçme shpall moskompetencë dhe ia referon çështjen Prokurorisë së Rrethit Gjyqësor Tiranë, duke i kërkuar të hetojë një zyrtare të lartë nën dyshimin për përvetësim të titullit apo funksionit publik.
E kuptoni ku jemi? Fillimisht, Partia Demokratike pretendoi se, nëse do të funksiononte një Task-Forcë për zgjedhjet, ajo duhej të vepronte në kohë reale dhe në kushtet e flagrancës. Prokuroritë, përkundrazi, nisën hetimet pasi përfunduan zgjedhjet dhe sot ndodhemi përballë një vendimi për mosfillim të hetimeve.
Nëse i referohemi vendimit të dhënë, është e qartë se Prokuroria e Posaçme ka pasur zero vullnet për të vepruar. Këtu nuk kemi të bëjmë me një çështje të parëndësishme, por me një kallëzim serioz nga Partia Demokratike – forca kryesore e opozitës – që lidhet me zgjedhjet dhe qëndrimin publik institucional. PD nuk është shërbim informativ, është një subjekt politik. Këto denoncime përbëjnë indicie të mjaftueshme që duhet të nxisin veprim penal nga organet e drejtësisë”, tha Logu per Syri tv.
