Presidenti i SHBA-së, Donald Trump, ka falur ish-sherifin e Virxhinias, Scott Jenkins, i cili ishte dënuar për mashtrim dhe marrje ryshfeti.
Jenkins, ish-sherif i Qarkut Culpeper dhe mbështetës i hershëm i Trump, u shpall fajtor nga një juri në dhjetor për pranimin e mbi 75 mijë dollarëve ryshfet, në këmbim të emërimit të disa biznesmenëve si oficerë të zbatimit të ligjit, pa trajnim të duhur.
Ai u dënua në mars me 10 vjet burg dhe pritej të niste vuajtjen e dënimit të martën. Por, falë dekretit të faljes nga Trump, ai nuk do të kalojë asnjë ditë në burg.
“Sherifi Scott Jenkins, bashkëshortja e tij Patricia dhe familja e tyre janë zvarritur nëpër FERR,” shkroi Trump në rrjetin e tij Truth Social, duke e cilësuar Jenkins si viktimë të një “Departamenti të Drejtësisë tepër të zellshëm për Bidenin”. Sipas Trump, Jenkins ishte “një person i mrekullueshëm” që u përndoq nga “monstrat e së majtës radikale”.
Gjyqi i Jenkins u drejtua nga gjyqtari Robert Ballou, i emëruar nga Presidenti Joe Biden, por vendimi u mor nga një juri.
Jenkins u shpall fajtor për një akuzë për komplot, katër akuza për mashtrim dhe shtatë akuza për ryshfet, të lidhura me programe që merrnin fonde federale. Prokurorët thanë se ai pranoi ryshfete nga tetë persona, përfshirë edhe dy agjentë të fshehtë të FBI-së, në formë parash të gatshme dhe kontributesh për fushatë.
Posti i tij ishte një funksion i zgjedhur, dhe ai lejoi persona që paguanin ryshfet të merrnin pozicione si ndihmëssherifë, të cilët, edhe pse në pozicione vullnetare, kishin kompetenca të plota ligjore. Kjo u mundësoi atyre të shmangnin gjobat e trafikut apo të mbanin armë të fshehura pa leje.
Prokurori në detyrë i Virxhinias deklaroi se Jenkins kishte shkelur betimin e tij zyrtar dhe se drejtësia do të vihej në vend ndaj çdo zyrtari që abuzon me detyrën për përfitime personale.
Pas dënimit, Jenkins i bëri thirrje Trump për ndihmë, duke thënë: “Unë besoj se nëse ai do ta kishte dëgjuar historinë time, do të më ndihmonte”.
Jenkins u zgjodh sherif në vitin 2011 dhe mori detyrën në janar 2012. Ai u rizgjodh në vitet 2015 dhe 2019.
Ai është vetëm një nga mbështetësit e shumtë të Trump që kanë marrë falje. Në janar, Trump dha afro 1,600 falje apo lehtësime dënimi për persona të akuzuar për trazirat në Kapitol në vitin 2021.
Sipas Kushtetutës së SHBA-së, presidenti ka të drejtë të japë falje apo të pezullojë dënime për vepra penale federale (me përjashtim të procedurave të shkarkimit). Një falje ligjore i jep fund çdo ndëshkimi të mëtejshëm dhe rikthen të drejtat si e drejta për të votuar apo për të kandiduar për poste publike.
