Një det i vërtetë ngjyrë kaltër ka ‘përmbytur’ Lungomaren Caracciolo këtë pasdite, ku rreth 200 mijë tifozë napolitanë janë mbledhur për të festuar titullin e katërt kampion të Italisë të fituar nga skuadra e zemrës së tyre.
Nën ritmet e “Pedro Pedro” të Raffaella Carrà, autobusët e hapur të ekipit kanë përshkuar afërsisht tre kilometra rrugë, që nga Piazza Vittoria deri në zonat qendrore buzë detit, duke sjellë entuziazëm dhe emocione të paharrueshme.
Kapiteni Giovanni Di Lorenzo, bashkë me gjithë ekipin dhe stafin, ka ngritur lart kupën e titullit të Serisë A, përballë një turme që nuk ndalej së brohorituri. Tromba, flamurë, tymuese dhe këngë kanë krijuar një atmosferë elektrizuese që prej mëngjesit.
Për mbarëvajtjen e festës janë angazhuar mbi 1.000 forca sigurie, ndërsa janë vendosur katër ekrane gjigante për t’u mundësuar të gjithëve ndjekjen e parakalimit.
Për të shmangur turmat e tepërta dhe për të menaxhuar më mirë sigurinë, klubi vendosi që parada të zhvillohej ditën e hënë, në orën 15:00. Gjithçka nisi zyrtarisht kur skuadra u nis nga moli Pisacane, në praninë edhe të kryetarit të bashkisë, Gaetano Manfredi, për të zbarkuar më pas në molin Luise, prej nga ku filloi edhe sfilata madhështore.
“Ag4in”: Një festë për historinë
Slogani i zgjedhur për këtë sukses ishte “Ag4in”, në nderim të titullit të katërt në historinë e Napolit. Një autobus i dedikuar ishte për lojtarët, ndërsa një tjetër për presidentin Aurelio De Laurentiis, stafin teknik dhe drejtuesit. Zjarrfikësit freskuan tifozët herë pas here me ujë për shkak të temperaturave të larta, ndërkohë që flamurër e kaltër të Napolit e bënë Lungomaren të duket si një det futbolli.
Parada zgjati rreth një orë e gjysmë, dhe pas përfundimit, skuadra u largua sërish drejt një vendi të fshehtë, ku në mbrëmje ishte planifikuar një festë private.
Napoli kampion, qyteti i festës
Ky triumf nuk është vetëm sportiv, por edhe social e emocional, një shpërthim krenarie për një qytet që jeton dhe frymon për futbollin. Napoli është sërish në majë të Italisë, dhe festa në Lungomare do të mbetet gjatë në kujtesën e një populli që i dhuron botës një tjetër shembull të dashurisë për skuadrën e zemrës.
