Humbjet e zgjedhjeve parlamentare të 11 majit, ka bërë që Sali Berisha t’i quajë këto votime si të vjedhura, apo ndryshe siç i cilëson ai dhe forca e tij politike, si farsë elektorale.
I ftuar në emisionin “Opinion”, Berisha ka vijuar me akuzat se zgjedhjet ishin të “vjedhura”, duke u shprehur se partia në pushtet, pra socialistët me në krye Edi Ramën, kanë përdorur të gjitha burimet shtetërore në favor të tyre. Kryedemokrati tha se duke përdorur burime të tilla, e kanë kthyer 11 majin si një farsë elektorale, e jo më zgjedhje demokratike.
“Çfarë janë zgjedhjet? Është një garë mes disa lojtarëve. Nëse një lojtar del në fushë me të gjithë makinerinë e shtetit, ku ka për komisionerë dhe operatorë punonjës elektoral administratën, ku ka të gjitha burimet e shtetit në dispozicion, ku ka të gjithë financat e shtetit në dispozicion të zgjedhjeve, ku ka në dispozicion të gjitha institucionet e shtetit. I nderuar zotëri, pikërisht kjo është farsa. Këtu s’ka më zgjedhje”, tha Berisha.
I pyetur nga Fevziu nëse e dinte që Partia Demokratike do të humbte zgjedhjet parlamentare, Berisha as nuk aprovoi, por as nuk mohoi, duke u shprehur se një fushatë elektorale ka nevojë për mobilizim dhe motivim.
Berisha: Putini merr 80% të votave, diktatorët 90%. Ka një dallim. Besoj se detyra e opozitës është të faktojë qytetarëve se ç’po ndodh në vend. Ne e faktuam, me zërin e të gjitha partive të djathta në botë.
Fevziu: Ju e dinit që do humbnit zgjedhjet?
Berisha: Edhe një herë. Unë jam personi që kam deklaruar se me Edi Ramën nuk ka zgjedhje. Pse?
Fevziu: Ju thatë që do fitojmë. Të kam pyetur, më ke thënë është si të bjerë borë, e ra borë sipër çudi.
Berisha: Nëse ti mendon se do bësh fushatë e do thuash s’do fitojmë… Ti do mobilizosh, ti do motivosh, apo jo?
