Në një deklaratë për mediat, përfaqësuesi ligjor i Partisë Demokratike, Marash Logu, ka reaguar lidhur me vendimin e Komisionerit Celibashi mbi njohjen dhe nisjen e numërimit të votave të Greqisë.
Ai ka bërë të ditur se PD ka ndërmarrë menjëherë hapat ligjorë duke e ankimuar vendimin pranë Komisionit të Ankimeve dhe Sanksioneve.
Sipas Logut, kërkesa përfshin jo vetëm shfuqizimin, por edhe pezullimin e menjëhershëm të vendimit. Ai theksoi se procesi është ende në zhvillim dhe PD do të ndjekë çdo rrugë ligjore për të mbrojtur vullnetin e qytetarëve.
Deklarata:
Menjëherë sapo është zbardhur vendimi i Komisionerit Celibashi, kemi ushtruar ankim në Komisionin e Ankimeve dhe Sanksioneve, duke kërkuar jo vetëm shfuqizimin e këtij vendimi, por edhe pezullimin e tij. Aktualisht jemi në pritje të mbledhjes urgjente të KAS-it për shqyrtimin e ankimimit tonë.
Nga ana tjetër, të gjithë numëruesit dhe komisionerët e Partisë Demokratike që ndodhen në Parkun Olimpik kanë kontestuar çdo votë të ardhur nga Greqia, për shkak të të gjitha pretendimeve që kemi paraqitur. Kërkesa jonë është shumë e qartë: derisa të provohet se këto zarfe janë dërguar nga zgjedhës shqiptarë, do të kërkojmë që ato të mos përfshihen në rezultatin përfundimtar të zgjedhjeve.
Këto vota janë kundërshtuar në procesverbalet përkatëse nga numëruesit dhe komisionerët tanë. Edhe pse procesi i numërimit vijon deri në përfundimin e tij, komisionerët tanë kanë shënuar të gjitha kontestimet tona, përfshirë edhe kërkesën për mospërfshirjen e këtyre votave në rezultatin përfundimtar të zgjedhjeve.
Të gjitha këto do të shqyrtohen në momentin kur dosja t’i paraqitet Komisionerit për shpalljen e rezultatit përfundimtar. Edhe një herë tjetër, në atë fazë do të kemi mundësinë të paraqesim kërkesat dhe pretendimet tona, duke kërkuar që çdo zarf që nuk provohet në mënyrë të pakundërshtueshme si i ardhur nga një zgjedhës shqiptar, të mos përfshihet në rezultatin përfundimtar.
Ne nuk kemi hequr dorë nga beteja jonë për të mbrojtur vullnetin e votuesve shqiptarë në Greqi, duke kërkuar që ai të mos jetë vullnet i patronazhistëve, por i vetë zgjedhësve shqiptarë. Vullneti i tyre do të njihet, vlerësohet dhe numërohet.
