Kreu i Autoritetit Rrugor Shqiptar (ARRSH) Gentian Gjyli është paraqitur mesditën e sotme në Prokurorinë e Posaçme (SPAK), ku i është komunikuar akuza dhe është komunikuar akuza dhe është marrë i pandehur.
Këtë e pranoi edhe vetë Gjyli pas daljes nga SPAK, kur u pyet nga gazetarët dhe tha “Po, patjetër”, dhe shtyu kameramanin duke i thënë “mos më hajde nga mbrapa”.
Burime për mediat bëjnë me dije se gjithsej janë 25 persona të cilët janë marrë nën hetim dhe u është komunikuar akuza, teksa bëhet fjalë për biznesmenë dhe zyrtarë publik, si edhe inxhinier të ARRSH-së. Ndaj tyre rëndojnë akuzat për shpërdorim detyre dhe shkelje e barazisë në tendera.
Hetimi ka të bëjë me abuzimet me tenderat e rrugëve, teksa mësohet se janë mbi 10 praktika prokurimi të hetuara dhe dosja po hetohet nga prokurori Dritan Prençi.
Gentian Gjyli është thirrur edhe më parë në SPAK, ku ka dëshmuar mbi dyshimet e abuzimeve mbi ato tendera.
Burime për mediat bëjnë me dije se i pandehur dhe i është komunikuar akuza e re edhe ish- kreut të ARRSH-së, Evis Berberi. Ky i fundit ndodhet në qeli, pasi gjatë kohës që ka qenë në krye të Agjencisë për Efiçencën e Energjisë, por dhe së fundmi në krye të ARRSH-së kishte dhënë 6 tendera kompanisë së ortakut të tij Valter Begaj dhe më pas fitimet i kalonin kompanisë që ai zotëronte në mënyrë indirekte.
Kujtojmë se Gentian Gjyli u emërua drejtor i ARRSH më 28 mars 2024, një javë pas arrestimit nga SPAK të ish-drejtorit Evis Berberi. Ky i fundit u arrestua me 14 mars 2024 me urdhër të SPAK pasi akuzohet për korrupsion pasiv dhe pastrim parash.
