Drejtuesi i fushatës së Partisë Demokratike, amerikani Chris LaCivita ka ironizuar kryeministrin Edi Rama, përmes një postimi në platformën X.
Kur na ndajnë edhe tre ditë nga zgjedhjet e 11 majit, LaCivita ka publikuar një foto simbolike që tregon një buf (term me të cilin Rama ofendon Berishën) që ka kapur një mi (term me të cilin LaCivita krahason Ramën), duke e shoqëruar me etiketimin e adresës zyrtare të kreut të qeverisë, Edi Rama, pa asnjë koment tjetër.
Ky ironizim i LaCivita vjen pak orë pasi gazetari amerikan i “Politico”, Marc Caputo ka njoftuar përmes një njoftimin në llogarinë e tij në platformën “X” se Departamenti Amerikan i Shtetit ka lejuar Sali Berishën të udhëtojë për në SHBA.
“E pyeta Departamentin e Shtetit për statusin e vizës së Berishës dhe më thanë se ai mund të vijë në SHBA” – shkruan gazetari që publikon edhe përgjigjen e DASH.
“Ne japim rregullisht përjashtime për të lehtësuar udhëtimin e individëve të caktuar në SHBA, në përputhje me detyrimet ndërkombëtare dhe interesat tona kombëtare. Si e tillë, ne nuk do të lejojmë që interesat tona të politikës së jashtme apo marrëdhëniet me Shqipërinë të mbahen peng nga vendime të politizuara të epokës së Biden-it” – thuhet në reagimin e Departamentit Amerikan të Shtetit dërguar për gazetarin.
LEXO EDHE:
Ekskluzive/ Gazetari amerikan: Departamenti i Shtetit lejon Sali Berishën të udhëtojë në SHBA
