Tom Doshi, ka zhvilluar një miting në Vaun e Dejës, ku ka vazhduar akuzat drejt Benet Becit, të cilit i është drejtuar me fjalët se ka qenë ai që e solli në krye të Bashkisë së Shkodrës.
Ai e ka konsideruar Benet Becin si një hajdut dhe se i bën presione qytetarëve për të mos e votuar atë, teksa shtoi dhe se kandidatët e PS-së po i blen vota njëri-tjetrit.
Sipas Tom Doshit, pas zgjedhjeve Benet Beci do të shkojë në burg, dhe se për Bashkinë e Shkodrës do të bëhen zgjedhje të parakohshme, duke thënë se do të mbështesë sërish kandidatin e PS-së.
Tom Doshi pati një përgjigje edhe për Edi Ramën, i cili dy ditë më parë në një intervistë për emisionin “Të Paekspozuarit” tha se nuk ka nevojë për askënd për të formuar qeverinë pas 11 Majit. Doshi tha se PSD-ja do të jetë faktor në zjedhje dhe se PS-ja duhet t’i bëjë mirë llogaritë, pasi nuk e formon dot qeverinë pa të.
“Nuk ndikon më presioni jot kundër votuesve të PSD. Edhe socialistët janë bërë me mua, sepse lista e mbyllur që keni hartuar nuk përfaqëson socialistët në Shkodër. Program ynë është social. Të gjithë subvencionet për fermerët janë vjedhur.
Po bëhet presion mbi votuesit tanë. Ka arrit puna që drejtoi i spitalit Shkodër t’u kërkojë punonjëve me vendos kryqin, jo X, këtu e dimë ne se ke votuar PS. Si mendoni, se i bëni preson popullit të Shkodrës mos më votu mua. O Benet strajca, që unë të solla në atë bashki. O hajdut, që pas zgjedhjeve do të shkosh në burg. Benet Strajca një do të kishte mbledhur krerët e bashkive dhe kandidatët për deputetë. Edhe u thotë po blini votat e njëri-tjetrit. Ky është krim zgjedhor dhe do t’ia dorëzojmë SPAK. Frrok Gjini i thotë; O Benet ka ardh Çim Sterka të blejë vota te djali i xhaxhait tim. Çfarë është kjo punë kështu?’ -Kështu duhet me i marrë mandatet.
Për këtë ju garantoj se sot kemi 3 mandate, u bëj thirrje socialistëve dhe demokratëve të votojnë PSD. Në Shkodër do të kemi zgjedhje të parakohshme. Nuk do t’ia lëmë Sali Berishës. Do ta ketë sërish PS, po jo me njerëz të korruptuar si Benet Beci. Ju e dini sesi pa PSD nuk fitohet as Vau i Dejës, as Malësia e Madhe dhe as Shkodra. Ne prapë do ta mbështesim PS, por nuk mbështesim të korruptuarit si Benet Beci dhe drejtorëve që ka vënë Beneti. Duhet 5 mijë euro me marr legalizimin e shtëpisë në Shkodër. E din Shkodra, kur kam qenë unë në krye të PS nuk ka pagur kush lekë as për të hyrë në punë as për të marrë hipotekë. Për këtë do të na votojnë socialistët.
PSD është faktor në këto zgjedhje. Ka qenë faktor edhe në 2021 sikur LSI të merrte ato katër mandate, PS mbete me katër mandate. Vetëm prej PSD kishte mundësi me qeveris. Askush nuk do të ketë aleat. Dhe ky i Kosovës, Kurti mendoi se i fitonte vetëm zgjedhjet dhe sot u lutet të gjitha partive ‘hajde të bëjmë koalicion’. Kjo nuk do të ndodhë me PS. Ne i premtojmë që sot, ne jemi mbështetës të PS, por nuk mbështesim ministrat e korruptuar që do të shkojnë në burg prapë nesër.”
Çfarë tha Rama dy ditë më parë për koalicionin?
Pyetje: Partia e Tom Doshit merr deputetë. Ju do bashkoheni nëse do ju duhet?
Rama: Nuk do bashkohemi me askënd sepse ne jemi të bashkuar me shumicën e shqiptarëve. Kemi koalicionin me shumicën e shqiptarëve. S’kemi nevojë të marrim të tjerë në prehër dhe të na thonë që shiko ose do më ushqesh mua ose do lëviz timonin dhe do ju hedh juve.
