Nga Boldnews.al
Një aktivitet, në dukje social-kulturor, i zhvilluar mbrëmjen e së dielës dhe i mbështetur nga Bashkia e Tiranës për banorët e Kombinatit, shërbeu si një mbulesë për fushatë zgjedhore të Ministrit të Kulturës dhe kandidatit socialist për në Parlament, Blendi Gonxhja, në shkelje flagrante të ligjit elektoral.
Kodi Zgjedhor ndalon në mënyrë specifike përdorimin e fondeve publike gjatë fushatës zgjedhore. Por, në Bashkinë e Tiranës askush nuk shqetësohet për ligjin, pavarësisht se kryetari në detyrë, Erion Veliaj, si edhe një dyzinë drejtorësh të tij janë të arrestuar apo në gjykim penal.
Pasditen e kësaj të diele (4 maj 2025), punonësit e Policisë Bashkiake rrethuan sheshin “Garibaldi”, zona qendrore e lagjes Kombinat, në kuadër të aktivitetit “Helldrift-Street Party”, një organizim, ku u prezantuan makina të fuqishme dhe automjete të vjetra, kryesisht të periudhës së komunizimit.
Aktiviteti organizohej nga “First Class Albania” dhe Bashkia e Tiranës. Një aktivitet i tillë, i zhvilluar vetëm një javë para zgjedhjeve, në Kombinatin e harruar nga projektet kulturore dhe i lënë gërmadhë që prej tërmetit të nëntorit 2019, krijonte paraprakisht shijen e një projekti thellësisht elektoral.
Këtë “shije” e konfirmoi plotësisht Blendi Gonxhja, kandidat për deputet dhe i dërguari politik i Partisë Socialiste për fushatën elektorale në zonën e Kombinatit.
Organizatorët e aktivitetetit e kishin njoftuar disa ditë më parë në rrjete sociale. Por, paralelisht, këtë aktivitet e reklamonte në “Facebook” edhe kandidati Blendi Gonxhja.
Teorikisht, ky aktivitet, ishte një organizim privat, i mbështetur nga Bashkia e Tiranës, në kuadër të jetën kulturore të qytetit. Megjithatë, ajo që ndodhi në terren, nuk ishte asgjë më shumë se sa fushatë elektorale në favor të Blendi Gonxhes dhe me financimin publik të taksave të qytetarëve.
Gonxhja ka publikuar një album të tërë fotografik nga ky aktivitet, duke marrë, praktikisht, rolin e organizatorit të aktivitetit.
“Adrenalinë, muzikë e mirë dhe energji pa fund në zemër të Kombinatit! Sheshi “Garibaldi” u ndez nga spektakli i driftit, efektet dhe ritmet që bashkuan qindra të rinj e qytetarë në një ngjarje e atmosferë të pa parë më parë në Kombinat!”, shkruan Gonxhja, në një postim, shoqëruar me foto, ku dallohet edhe drejtuesja politike e Partisë Socialiste për Tiranën, Ogerta Manastirliu.
Dyshimet që aktiviteti organizohej nga dhe për Blendi Gonxhen ishin edhe pjesëmarrja e disa makinave të vjetra, “Retro”.
Blendi Gonxhe, gjatë kohës që ishte titullar në Drejtorinë e Shërbimit të Transportit Rrugor (DPSHTRR), i reklamonte shpesh makinat e tipit të vjetër, të cilat i konsideronte si “gurin e kurorës” së tij si drejtor.
Pikërisht, këto makina “retro”, gjendeshin në aktivitetin e së dielës në Kombinat, një fakt që plotësonte më së miri panoramën se organizimi kulturor, nuk ishte asgjë më shumë se sa një aktivitet elektoral, i kamufluar me ngjyra dhe zhurma automjetesh.
Pas “përzënies” së Erion Veliaj, nëpërmjet arrestimit për korrupsion dhe pastrim parash, Bashkia e Tiranës, e marrë tërësisht në kontroll nga kryeministri Edi Rama, po tregohet shumë dashamirëse me Blendi Gonxhen, njeriun që, më shumë mundësi, do të jetë kandidati kryesor i kryeministrit për të marrë drejtimin e pushtetit lokal në Tiranë.
