Interpol Tirana, në bashkëpunim me autoritetet e Interpol Ankarasë dhe Interpol Athinës, ka finalizuar procedurat për ekstradimin e dy shtetasve të kërkuar ndërkombëtarisht.
Në Greqi u ekstradua 59-vjeçari me iniciale I. A., i lindur në Bullgari dhe i akuzuar për ndërmjetësim të paligjshëm për birësim. Ai dyshohet se ka organizuar raste të dhënies për birësim të foshnjave të lindura nga gra shtatzëna në kushte të vështira ekonomike, kundrejt pagesave nga 2,000 deri në 4,000 euro për rast.
“I. A., 59 vjeç, i lindur në Bullgari, sepse ishte shpallur në kërkim ndërkombëtar nga Interpol Athina, mbi akuzën se në bashkëpunim me të tjerë, gjente gra shtatzëna (në vështirësi ekonomike), të cilat i çonte në Greqi për të lindur dhe më pas ndërmjetësonte për dhënien e foshnjës, për birësim. Nga kjo veprimtari kriminale ky shtetas dyshohet se ka përfituar 2000-4000 euro/rast. Ai është arrestuar nga shërbimet e Policisë Kufitare të Korçës”, njofton Policia.
Ndërsa në Turqi u ekstradua shtetasi Burak Kara, 39 vjeç, i dënuar me 8 vjet e 4 muaj burg nga Gjykata e Mersinit për kryerjen e marrëdhënieve seksuale me dhunë, në vitin 2011. Nga ky dënim, atij i kanë mbetur për të vuajtur rreth 4 vjet e gjysmë.
“Burak Kara, 39 vjeç, i lindur në Turqi, sepse Gjykata e Mersin, në vitin 2022, e ka dënuar këtë shtetas, me 8 vjet e 4 muaj burgim, pasi në vitin 2011, në gjendje të dehur, ka kryer marrëdhënie seksuale me dhunë, me një shtetase turke, në banesën e një shtetaseje tjetër, gjithashtu turke, në Mersin. Nga dënimi, 39-vjeçarit i kanë mbetur për të vuajtur rreth 4 vjet e gjysmë burgim”.
Të dy ekstradimet u kryen pas arrestimeve dhe verifikimeve ligjore të nevojshme nga autoritetet shqiptare.
