Gjykata e Posaçme ka dhënë ditën e sotme vendimin për të pandehurit në lidhje me hetimet e kryera tek institucioni i Entit Kombëtar të Banesave, të cilat sipas SPAK, premtonin dhënien e banesave sociale kundrejt shumave monetare, në qytetin e Durrësit.
Të pandehur për këtë çështjet ishin marrë shtetasit Gëzim Sylaj, Vasil Karasaliu, Viola Mema, Behare Luzi, Enxhi Çelaj, Gazmend Panxha dhe Sokol Sylaj, ku të gjithë janë shpallur fajtor nga GJKKO për kryerjen e veprës penale të “Ushtrimi i ndikimit të paligjshëm ndaj personave që ushtrojnë funksione publike”, kryer në bashkëpunim.
Ndërkohë, Gëzim Sylaj është shpallur fajtor edhe për kryerjen e veprës penale të “Prodhimi dhe mbajtja pa leje e armëve të gjuetisë dhe sportive”.
Ata kishin ngritur një skemë përfitimi të paligjshme duke u prezantuar si punonjës me funksione drejtuese dhe vendimarrëse në dhënien e disa banesave sociale që ndodheshin në zonën e Spitallës në Durrës kundrejt përfitimit të shumës prej 15 mijë eurosh, e cila do të shërbente për bllokimin e banesës dhe dhënies së “kafeve” ndaj të tretëve.
Dënimet e dhëna nga GJKKO
- Gëzim Sylaj dënohet me 3 vite e 6 muaj burgim – Nga gjykimi i shkurtuar i ulet dënimi në 2 vite e 4 muaj burgim
- Vasil Karasaliu dënohet me 2 vite burgim – Nga gjykimi i shkurtuar i ulet dënimi në 1 vit e 4 muaj burgim
- Viola Mema dënohet me 3 vite burgim – Nga gjykimi i shkurtuar i ulet dënimi në 2 vite burgim
- Behare Luzi dënohet me 3 vite burgim – Nga gjykimi i shkurtuar i ulet dënimi në 2 vite burgim – I konvertohet në 4 vite shërbim prove
- Enxhi Çelaj dënohet me 2 vite e 9 muaj burgim – Nga gjykimi i shkurtuar i ulet dënimi në 1 vit e 10 muaj burgim – I konvertohet në 3 vite e 8 muaj shërbim prove
- Gazmend Panxha dënohet me 1 vit e 3 muaj burgim – Nga gjykimi i shkurtuar i ulet dënimi në 10 muaj burgim – I konvertohet në 20 muaj shërbim prove
- Sokol Sylaj dënohet me 1 vit burgim – Nga gjykimi i shkurtuar i ulet dënimi në 8 muaj burgim – I konvertohet në 16 muaj shërbim prove
Vendimi është dhënë nga trupa gjykuese e përbërë nga gjyqtarët Bib Ndreca, Etleva Deda dhe Erjon Çela.
SKEMA E MASHTRIMIT
“Sipas akteve të administruara për këtë procedim penal, ndër të tjera, edhe informacioni paraprak i depozituar nga redaksia e emisionit investigativ “Fiks Fare” në televizionin kombëtar “Top Channel”, jemi vënë në dijeni se një bashkëpunëtor i këtij emisioni gjatë muajit Janar 2023, ka mundur të realizojë disa takime me të pandehurin Vasil Karasaliu (punonjës pranë Ujësjellës Kanalizime në Durrës), i cili, i ka premtuar përfitimin e një banese sociale në zonën e Spitallës Durrës, kundrejt dhënies si shpërblim të shumës prej 15,000 euro.
Nga tërësia e veprimeve hetimore të kryera, ka rezultuar dhe provuar se të pandehurit Gezim Sylaj, Vasil Karasliu, Viola Mema, Behare Luzi dhe Enxhi Çelaj kishin ngritur skemën e përfitimeve të paligjshme, duke u prezantuar si punonjës me funksione drejtuese në administratën shtetërore, të cilët kishin dhe mundësi vendimmarrjeje në dhënien e banesave sociale që ndodheshin në zonën e Spitallës, Durrës, personave të interesuar, kundrejt shumave monetare, që sipas tyre do shërbenin për bllokimin e banesës përmes dhënies së “kafeve” ndaj të tretëve.
Personat e interesuari për banesë sociale, përveç pagesës paraprake të shumës monetare do vijonin t’iu dorëzonin të pandehurve dokumentacionin për vijimin e procedurës standarde të përfitimit të banesës sociale. Më pas, sipas tyre, personave të interesuar do tu dërgohej një SMS konfirmimi nga ana e Bashkisë Durrës, periudhë kur sipas tyre do bëhej shpallja e fituesve dhe në banesë do futeshin pas disa muajsh. Pas këtij momenti, përfituesi i banesës sociale detyrohej që të paguante një qera minimale për disa vite, shumë e cila do të vlerësohej në bazë të sipërfaqes për m2 që do përfitonte.
Të pandehurit në bashkëpunim me njëri-tjetrin, mes datave 01.02.2023-01.03.2023 kanë kërkuar dhe marrë përfitim të parregullt respektivisht në 4 episode, ndaj disa subjekteve (agjentit në mbulim, si dhe ndaj tre subjekteve të tjerë), shuma monetare që variojnë nga 5 000 deri në 10 000 euro, tek të cilët kanë siguruar aftësinë për të ushtruar ndikim të paligjshëm në kryerjen e detyrës nga persona që ushtrojnë funksione publike për të mundësuar përfitimin e një banese sociale në Durrës.
Ndërsa, të pandehurit e tjerë, Gazmend Panxha, Shyqyri Dema dhe Tahir Sylaj, provohet se u kanë premtuar dhe dhënë drejtpërdrejt respektivisht të pandehurve; Gezim Sylaj, Vasil Karasliu, Viola Mema, Behare Luzi dhe Enxhi Çelaj, shumat monetare (në vlerën mbi 50.000 lekë), të cilët u kanë premtuar ose u kanë siguruar atyre se janë në gjendje të ushtrojë ndikim të paligjshëm në kryerjen e detyrës dhe marrjen e vendimeve nga personat që ushtrojnë funksione publike, për të përftuar banesa sociale.
Ndodhur para situatës kur të pandehurit Gazmend Panxha, Shyqyri Dema dhe Tahir Sylaj, nuk kanë lidhur më parë marrëveshje bashkëpunimi, kryerja e veprimeve të mësipërme, i ngarkon me përgjegjësi penale sa i përket premtimit dhe dhënies drejtpërdrejt të shumave monetare në vlerën mbi 50.000 lekë, të pandehurve Gezim Sylaj, Vasil Karasliu, Viola Mema, Behare Luzi dhe Enxhi Çelaj, në këmbim të përftimit të banesave sociale duke konsumuar elementë të veprës penale “Ushtrim i ndikimit të paligjshëm ndaj personave që ushtrojnë funksione publike, të parashikuar nga neni 245/1 paragrafi 2 i Kodit Penal.” – thuhej në njoftimin e SPAK.
