Personi që shihni në foton e mëposhtme është 51-vjeçari nga Roskoveci, Adriano Shabanaj alias Ilir Shabanaj.
Ai është shpallur në kërkim si autori i plagosjes së regjistruar pas sherrit masiv mbrëmjen e djeshme në ambientet e një lokali në rrugën “Sami Frashëri” në Tiranë.
Sipas autoriteteve policore, gjatë konfliktit të dhunshëm, ai ka qëlluar me armë zjarri pistoletë, pa patur të plagosur nga të shtënat, teksa ka goditur me qytën e pistoletës dhe 40-vjeçarin Kasem Stani (Pasha). Pistoleta u gjet në lokal, së bashku me një gëzhojë, pasi dyshohet se i ka rënë Shabanajt në tokë gjatë sherrit.
Deri më tani pista kryesore është ajo e një konflikti banal të çastit, i cili burimet thonë se nisi pasi njëri prej të arrestuarve, Kasem Stani nuk pranoi t’i japë dorën Shabanajt. Pas kësaj ka nisur një debat i rëndë me fjalë banale, dhe ka përfunduar deri në përleshje të rëndë fizike, me sende të forta.
Në lidhje me këtë ngjarja, Policia ka arrestuar 8 persona për “moskallëzim krimi”, shtetasit Kasem Stani (Pasha), Elton Ajredinaj, Emiljan Ruko, Bjorni Tahiraj, Eriald Tahiraj, Denikiajder Tahiraj, Eduart Sulaj, dhe Kastriot Stani.
Adriano Shabanaj alias Ilir Shabanaj rezulton të ketë qenë kryetar i komunës së Kurjanit në Roskovec, i zgjedhur në vitin 2011, teksa ka qenë dhe i arrestuar për plagosje, trafik armësh dhe drogë.
Më 13 shtator të vitit 2020, në aksin rrugor Kosovë e Vogël-Jeta e Re, Adriano alias Ilir Shabanaj ka plagosur me armë zjarri shtetasin Mario Arapaj. Në lidhje me këtë ngjarje ai u shpall në kërkim dhe u arrestua në Qershor të vitit 2021, teksa kur u kap nga uniformat blu iu sekuestruan edhe 9 celularë dhe një shumë prej dy mijë eurosh. Nuk dihet se për sa kohë ai qëndroi në burg dhe si arriti të ishte brenda pak vitesh sërish i lirë.
Po ashtu, në vitin 2018, Adriano Shabanaj alias Ilir Shabanaj u arrestua nga autoritetet italiane si pjesë e një grupi kriminal që trafikonte drogë dhe armë. Ai ishte një ndër 14 shqiptarët e përfshirë në një organizatë prej të paktën 20 anëtarësh, që operonte mes Shqipërisë, Holandës dhe Italisë.
