Prokuroria e Posaçme (SPAK) ka kërkuar shtyrjen dhe me 3 muaj të tjerë të hetimeve për ish-deputetin e PS-së, Jurgis Çyrbja, i cili aktualisht ndodhet në burgun e Durrësit. Shkak për shtyrjen e hetimeve është pritja për marrjen e përgjigjeve për disa letër-porosi të nisura agjencive partnere jashtë vendit.
Kërkesa për shtyrje afatesh u bë në seancën e sotme (15 prill), teksa avokatët e Jurgis Çyrbjas kërkuan kohë të njihen me kërkesën e SPAK. Seanca për një vendimmarrje u la për ditën e premte.
Jurgis Çyrbja u arrestua në Tetor të vitit të kaluar, pak ditë pasi dha dorëheqjen nga mandati i deputetit, të cilin e mbante që nga viti 2017. Mbi të rëndojnë akuzat për veprat penale “Korrupsioni aktiv në zgjedhje”, “Përkrahja e autorit të krimit” si dhe “Tregëtimi i sekretit shtetëror nga shtetasit”.
Nga bisedat e zbërthyera në aplikacionin e “Sky Ecc”, ka rezultuar se në prag të zgjedhjeve parlamentare të vitit 2021, Jurgis Çyrbja, i cili kandidonte në zonën e Shijakut, ka marrë premtimin e Altin Hajrit, një person i shumëkërkuar për rrëmbimin dhe zhdukjen e Jan Prengës, se ai do t’i siguronte mijëra vota në zonën e tij elektorale.
Hetimet e SPAK tregojnë se Çyrbja ishte një investim i krimit të organizuar në listën e sigurt të kandidatëve të PS-së në zonën e Durrësit – ndërkohë që akuzohet se u shërbente atyre me informacione sekrete mbi operacionet policore apo me ndihmë në rastet kur kishin probleme me institucionet ligjzbatuese.
