Edi Rama, gjatë një bashkëbisedimi me ndjekësit në rrjetet sociale ka komentuar edhe reformën në drejtësi, ku nuk la pa lëvduar kreun e SPAK-ut Altin Dumanin, duke e quajtur një burrë të zotin dhe të ndershëm. Rama tha se Dumani, ka qenë i zoti, por nuk kishte “shpatën”, që sipas tij, ia dorëzoi ai.
“Jam shum krenar për reformën në drejtësi, për të gjitha ato që kemi bërë, sepse kemi bërë histori më këtë. Nuk e ka bërë kush tjetër më përpara të dorëzojë shpatën e ndëshkimit nga kjo zyrë, nga pushteti ekzekutiv tek një drejtësi e pavarur prej pushtetit ekzekutiv. Kjo është rruga për t’iu dhënë fëmijëve tanë një vend me barazi para ligjit, ku çdo institucion të bëjë punën e vet.
Altin Dumani është një burrë i zoti dhe i ndershëm prej shumë vitesh, e kishe dëgjuar më parë, kishte thirrë ndonjë njeri në pushtet ti thoshte hajde këtu? Kishte parë njerëz në pushtet të kalonin para prokurorisë me kamera si në festivalin e kanës. Nga hëna erdhi ky Altin Dumani? Një prokuror këtu në Tiranë me vite e vite të tëra, por nuk kishte shpatën se shpata ishte tek kjo zyra këtu. Bufi futi në burg kundërshtarin e tij politik përmes një drejtësie kukull dhe me shpatën që kishte këtu. Unë atë shpatën e mora dhe ia dorëzova drejtësisë. Meqë Altin Dumanit nuk i kanë lënë rob shpie pa i thënë për turpin e tyre, ka gjithë solidaritetin tonë” – tha kryeministri.
Rama iu përgjigj edhe një pyetjeje lidhur me zyrtarët e arrestuar të PS-së, ku tha se prej shumë kohësh, sipas tij, asnjë anëtar i qeverisë nuk është në burg, ndërsa shtoi se edhe kur kjo ka ndodhur, këta persona s’kanë qenë anëtarë të qeverisë.
“E para nuk rri tërë ditën se po të shikosh edhe postimet këtu, e arrin kollaj konkluzionin se tërë ditën merren me shumëçka tjetër. Por ama nëse prekesh se në ato pak minuta që merrem me bufin e Lulin tërhiqet vëmendja dhe nuk e di dmth, çfarë ideje të krijohet më vjen shumë keq. E dyta, kjo e gjysmës së qeverisë në burg është qesharake. Nuk kam në burg asnjë anëtar të qeverisë prej shumë kohe dhe në fakt po të shikosh të gjithë ata që janë marrë në hetim apo janë çuar në gjykim nuk kanë qenë anëtarë qeveria kur ka ndodhur. Kam 12 vjet këtu, nuk duhet të harroni se nëse juve ju erdhi dita të flisni për drejtësi, për ministra, për kryetar bashkish, për persona të lidhur me pushtetin politik por edhe për ish president dhe ish kryeministra, kjo nuk është ditë që erdhi nga qielli, por që e solli PS me mua në krye. Kjo është shprehja e vullnetit tonë absolut për të sjellë në Shqipëri atë që shqiptarët s’e kanë pasur kurrë barazinë para ligjit”, u shpreh Rama.
