Gjatë raportimit të raportit vjetor në Këshillin e Lartë të Prokurorisë (KLP, kreu i SPAK Altin Dumani ngriti si shqetësim se u nevojiten këshilltarë ligjorë, që t’u vinin në ndihmë prokurorëve për seancat në Apel, Gjykatë të Lartë dhe Kushtetuese.
Ai kërkoi nga KLP, të cilin e konsideroi si “qeveria” e prokurorëve që të adresojë pranë Kuvendit këtë shqetësim të tyre.
“Këtë problematikë e kemi adresuar edhe aty ku duhet, në Kuvendin, edhe në raportet e mëparshme. Është argumentuar nevoja e pasjes së këshilltarëve ligjorë. Por, duke konsideruar KLP si qeverinë e prokurorëve. ne menduam ta ngremë këtë problematikë edhe në këtë institucion. E dimë se cili është institucioni që mund të bëjë ndryshimet ligjore dhe i kemi adresuar dhe atje, por mendojmë se zëri ynë duhet të dëgjohet dhe nga KLP dhe si qeveria e prokurorëve të përcjellë te insticuonet që kanë në kompetencë për të bërë ndryshimet e duhura ligjore siç është kuvendi i republikës.”, u shpreh Dumani.
Sa i përket ekstradimeve, Dumani tha se kërkesa drejtuar autoriteteve të huaja për persona të lidhur me krimin e organizuar duhet të kalojë në kompetencë të SPAK.
“Nisur edhe nga fakti që këta shtetas janë shqiptarë, akuzuar, hetuar apo dënuar për vepra penale që kanë të bëjë me krimin e organizuar, do ishte e përshtatshme që edhe ekstradimi i drejtuar autoriteteve të huaja të ishte në kompetencën e SPAK, por jemi të vetëdijshëm që ka nevojë për ndryshime në kodin penal që të bëhet e mundur kjo.”, tha Dumani.
Gjithashtu, Dumani ripërsëriti sërish kërkesën se duhet të rritet kufiri monetar i korrupsionit që duhet të hetohet nga SPAK. Sipas tij, Prokuroria e Posaçme duhet të merret me rastet e korrupsionit madhor dhe jo të nisë hetime për çështje që fillojnë kur abuzimi është 500 euro.
“Sa i takon korrupsionit mbi shumën 50 mijë lekë të reja, ka nevojë të ndryshohet kufiri monetar, të rritet. Jam dakord me ju se korrupsioni duhet të përfshijë për të ndjekur rastet e korrupsionit të madh dhe subjektet e mëdha.” – tha Dumani.
Në lidhje me dosjet e mbartura, Dumani ngriti shqetësimin për zgjatjen e procedurave në seancat paraprake dhe ndikimin e tyre në afatet e paraburgimit.
“Një shqetësim që dua ta ngre është shqyrtimi përpara gjyqtarit të seancës paraprake. Ky shqyrtim merr shumë kohë. Kodi i procedurës parashikon që seanca paraprake ka afat njëmujor.
Kjo sjell problematika sa i përket afateve të paraburgimit. E njëjta situatë është edhe me gjykimin e shkurtuar. Aplikimi i tij tashmë kërkon kohë. Zgjatet koha e trajtimit të çështjes. Sa i takon zgjatjes së çështjeve të mbartura, hetimet kërkojnë kohë. Sa i takon përgjigjeve nga institucionet shtetërore, nuk them që është problematike dhe nuk kushtëzohet prokurori nga kjo. Çështjet që varen nga bashkëpunimi me autoritetet gjyqësore të huaja, ka raste që zgjasin shumë, 2-3 dhe 5 vite. Dhe ekzekutimi i letërporosive merr kohë. Nuk flas vetëm për krimin e organizuar por edhe për raste korruptive.” – tha kreu i SPAK.
