Në 27 vjet karrierë politike, Edi Rama e ka sofistikuar përdorimin e grave dhe vajzave si fasadë të progresit duke e shndërruar në një dekor propagandistik, që e prezanton Partinë Socialiste nën petkun e një force politike, që respekton thellësisht barazinë gjinore. Por realiteti ndonjëherë është më kokëfortë dhe e nxjerr në pah, atë që retorika politike e anashkalon me qëllim.
Edhe këtë të enjte, në të njëjtën ditë që opozita nisi zyrtarisht fushatën zgjedhore, Rama u përpoq të ndërtojë një kundërimazh politik, kur bëri bashkë gra dhe vajza socialiste në një aktivitet, ku siç pritej, ai ishte në qendër të vëmëndjes.
“Sot Kuvendi drejtohet nga një grua socialiste, e cila zëvendësoi një tjetër grua socialiste. Jam i bindur që nuk është aq e largët dita sa mund të dukej deri dje, kur Shqipëria do të ketë edhe gruan e parë kryeministre” u shpreh Rama.
Në fjalim nuk mungoi edhe një metaforë që kapi shpejt titujt e mediave, edhe pse tingëlloi si një klishe boshe e fushatës: “Shqipëria është grua! Europa është grua dhe suksesi për Shqipërinë 2030 varet në radhë të parë nga nënat, motrat dhe bijat e Shqipërisë” tha ai.
Por ndërsa fliste për fuqinë e grave, në panelin përkrah tij, dy gra – që përfaqësojnë më shumë sistemin se gjininë – nuk binin shumë në sy sepse u kishin caktuar një karrige jo aq të përshtatshme për detyrat e rëndësishme që kanë mbajtur mbi supe. Klotilda Bushka dhe Olta Xhaçka, dy figura me një karrierë të pasur në aparatin shtetëror, të dyja deputete të Partisë Socialiste.
Bushka, Kryetare e Komisionit të Ligjeve dhe Xhaçka, ish-Ministre e Punëve të Jashtme dhe e Mbrojtjes, të dyja ishin detyruar të ulen në rreshtat e fundit të karrigeve të panelit, atje ku kamera i evitoi gjatë gjithë takimit. Dhe kjo nuk ishte rastësi.
Klotilda Bushka është nën hetim nga Prokuroria e Posaçme, pasi akuzohet për kryerjen e veprimeve aktive “që pengojnë zbulimin e së vërtetës” në dosjen ndaj Erion Veliajt. Sipas dosjes, Bushka, bashkë me Ajola Xoxën, kanë ushtruar presion mbi dëshmitaren Ina Goxhaj që kjo të ndryshonte deklarimet për të gënjyer prokurorët.
Ndërkohë, Olta Xhaçka, ish-ministre e Jashtme dhe aktualisht deputete, është nën hetim nga SPAK për skemën me statusin e investitorit strategjik që i është dhënë bashkëshortit të saj, Artan Gaçi. Gjykata e Posaçme ka urdhëruar regjistrimin e procedimit penal ndaj saj dhe bashkëshortit për “Shpërdorim detyre”, “Falsifikim dokumentesh” dhe “Pastrimi i produkteve të veprës penale”, të gjitha në bashkëpunim. Vendimi i Gjykatës, i marrë më 28 shkurt, urdhëron SPAK të hetojë mënyrën se si është dhënë ky status nga Këshilli i Ministrave – një institucion ku Xhaçka vetë bënte pjesë në kohën e vendimit.
Simbolika është therëse: dy gra, që nuk i shërbejnë më as për fasadë Edi Ramës, ai që deri dje i ka promovuar si shembuj të emancipimit institucional, por janë sot përfaqësuese të një realiteti tjetër– atë të sistemit të korruptuar që nuk njeh gjini.
Kryeministri, që mburret se punon më mirë me gratë se me burrat, tani përpiqet të fshehë një konstatim të hidhur: kur sistemi është i kalbur, nuk ka rëndësi nëse je burrë apo grua –të gjithë detyrohen të ecin drejt të njëjtit destinacion: shkeljes së ligjit.
Ndaj si Klotilda Bushka, ashtu edhe Olta Xhaçka nuk ishin rastësisht në fund të rreshtave, por sepse tek to simbolizohet vetë dështimi i sistemit që Edi Rama ka ndërtuar pas 12 vitesh qeverisje dhe që batutat bajate me gra e me burra nuk e mbulojnë dot./ Lapsi.al
