Fakti që policia është ende e përqendruar në shtëpinë e familjes filipinase në kërkim të armës së vrasjes është konfirmim i skepticizmit që ekziston për të paktën një pjesë të deklaratave të studentit të arkitekturës.
Policia tashmë po kontrollon kompjuterin e autorit, së bashku me atë të viktimës, të cilin i riu tentoi ta hiqte nga shtëpia e 22-vjeçares në San Lorenzo vetëm pak orë para krimit.
Dyshimet janë se në kompjuter mund te gjenden shkëmbimet më të fundit të mesazheve, të cilat mund të ndihmojnë në zbardhjen e ngjarjes.
Sipas autorit, ajo që e shtyu të godiste vajzën me thikë ishte zbulimi i një ose më shumë mesazheve në Tinder të dërguara nga një student tjetër.
Në pritje të gjetjeve të reja hetimore, prindërve të autorit u është ndaluar largimi nga Italia. Nga sa rezulton deri më tani, nëna e Mark Samsonit nuk e shikonte me sy të mirë Ilaria Sulën, e cila frekuentonte shpesh shtëpinë e tyre për një vit.
“Nuk doja që Marku ta sillte gjithmonë Ilarian në shtëpi. Kisha frikë se do ta shpërqendronte shumë nga studimet e tij”, mësohet se ka thënë ajo para hetuesve ndërsa pritet që të pyetet. Për autoritetet roli i prindërve është i dyshimtë në këtë histori.
Ndërkohë, mbetet ende enigmë se ku përfundoi thika me të cilën i riu kreu krimin dhe telefoni i viktimës të cilin ai e përdori edhe 1 javë pas ngjarjes.
