Agjentët e doganave amerikane nisën të shtunën mbledhjen e tarifave prej 10 për qind të vendosura nga presidenti Donald Trump mbi produktete importuara.
Tarifa fillestare bazë prej 10 për qind e paguar nga importuesit hyri në fuqi në porte, aeroporte dhe dogana prej orës 4 të mëngjesit, me orën lokale, duke shënuar fundin e sistemit të përbashkët tarifor që ekzistonte që nga fundi i Luftës së Dytë Botërore.
Tarifat e vendosura nga Trump tronditën tregjet financiare botërore, duke i shkaktuar një humbje prej 5 trilionë dollarësh agjencisë “S&P”, një rënie e regjistruar për të dytën ditë rresht.
Të udhëhequra nga frika për recesion, çmimet e naftës dhe lëndëve të tjera bazë ranë ndjeshëm, ndërsa investitorët i kthyen sytë nga bondet qeveritare për siguri.
Mes vendeve që u goditën të parat nga tarifa prej 10 për qind ishin Australia, Britania, Brazili, Kolumbia, Argjentina dhe Arabia Saudite, pavarësisht se vitin e kaluar kishin një deficit tregtar pozitiv me Shtetet e Bashkuara.
Zyrtarë të Shtëpisë së Bardhë deklaruan se shumë vende do të thellonin shumë më tepër deficitin me Amerikën, nëse kjo e fundit do të zbatonte politika më të drejta.
Tarifat më të larta, nga 11 deri në 55 për qind pritet të hyjnë në fuqi të mërkurën e ardhshme, në orën 12 e 1 minutë të mëngjesit, me orën lokale.
Importet e Bashkimit Evropian do të përballen me 20 për qind tarifa, ndërsa produktet kineze me 34 për qind, duke e çuar taksën totale për vendin aziatik në 54 për qind.
“Kina është goditur më rëndë se Shtetet e Bashkuara, ajo as që i afrohet”, tha Trump të shtunën në rrjetet sociale.
Ai u shpreh se, ky është një revolucion ekonomik të cilin Amerika do ta fitojë. “Mbahuni fortë, sepse nuk do të jetë e lehtë. Por në fund rezultati do të jetë historik”, tha Trump.
Ndërsa Pekini zyrtar, duke iu përgjigjur presidentit amerikan, deklaroi se “tregu foli vetë” pas tronditjes që mori nga tarifat.
